• ຮູບປັ້ນ : ແມ່ນປະຕິມາກຳ ເວລາແປເປັນພາສາອັງກິດ ເຫັນເຂົາແປວ່າ Statue ຫຼື Sculpture ເຂົາບໍ່ແປດອກວ່າ Buddha Body ຫຼື Buddha Symbol ເພາະມັນບໍ່ແມ່ນ ຖ້າເປັນຄົນບໍ່ເກັ່ງພາສາອັງກິດ ແລະເຂົາໄດ້ຮັບຄຳສອນແບບຜິດໆວ່າ ຮູບປັ້ນກໍຄືສັນຍາລັກຂອງພຣະພຸດທະເຈົ້າ ຫຼື ຕົວແທນພຣະພຸດທະເຈົ້າ ບໍ່ດັນໄປແປວ່າ Buddha Symbol ຫຼື Buddha Representative ຫວາ ? ແລ້ວຖ້າໄປແປແບບນີ້ມັນຊິຖືກຕ້ອງໄດ້ແນວໃດ ? ເມື່ອເຈົ້າໃຊ້ຄຳສັບບໍ່ຖືກ ມັນສະທ້ອນເຖິງຫຍັງ ? ມັນກໍສະທ້ອນເຖິງຄວາມບໍ່ຮູ້ ເພາະຜູ້ມີຄວາມເຫັນຜິດ ຍ່ອມມີວາຈາຜິດ "... ດູກ່ອນພິກຂຸທັງຫຼາຍ ບຸກຄົນຜູ້ມີອະວິຊາ ບໍ່ເຫັນແຈ້ງ ຍ່ອມມີຄວາມເຫັນຜິດ ຜູ້ມີຄວາມເຫັນຜິດ ຍ່ອມມີຄວາມດຳຣິຜິດ ຜູ້ມີຄວາມດຳຣິຜິດ ຍ່ອມມີວາຈາຜິດ ..."
• ພຣະທາດເຈດີ : ແມ່ນອັດຖິ ຫຼືກະດູກທີ່ຄວນເຄົາລົບບູຊາ ເປັນວັດຖຸສືບເນື່ອງມາຈາກກາຍຂອງພຣະພຸດທະເຈົ້າ (ມາຈາກການເຜົາແລ້ວມີພຣະທາດ ຄືຕ້ອງຜ່ານອະນຸປາທິເສສະນິບພານທາດກ່ອນ ) ບໍ່ຄືກັບວັດຖຸຮູບປັ້ນ ທີ່ບໍ່ກ່ຽວຂ້ອງຫຍັງກັບພຣະພຸດທະເຈົ້າ ເວລາແປຄຳວ່າ ອັດຖິ ຫຼື ກະດູກ ເປັນພາສາອັງກິດ ເຂົາກໍໃຊ້ຄຳວ່າ Bone ແລ້ວບັດນີ້ Bone ກັບ Statue ຫຼື Sculpture ຕ່າງກັນ ແມ້ແຕ່ຄຳຮຽກກໍຕ່າງກັນ
• ປະຣິໂພກເຈດີ : ແມ່ນສະຖານທີ່ ຫຼື ວັດຖຸທີ່ພຣະພຸດທະເຈົ້າໃຊ້ສອຍ ທີ່ເຄົາລົບບູຊາ ເຊັ່ນ ຕົ້ນມະຫາໂພທີ່ຕັດສະຮູ້, ບາດ, ຈີວອນ, ສັງເວຊະນີຍະສະຖານ ... ຊຶ່ງເປັນສະຖານທີ່ກ່ຽວຂ້ອງກັບພຣະພຸດທະເຈົ້າ ຮູບປັ້ນເປັນວັດຖຸທີ່ພຣະພຸດທະເຈົ້າບໍ່ໄດ້ໃຊ້ສອຍເລີຍ ຈຶ່ງບໍ່ກ່ຽວຂ້ອງກັບພຣະພຸດທະເຈົ້າ ແຕ່ບາງຄົນກໍເອົາເລື່ອງປູກຕົ້ນໂພມາອ້າງໃສ່ ຊຶ່ງກໍບໍ່ສອດຄ່ອງ ເພາະຕົ້ນໂພກັບຮູບປັ້ນຄົນລະຢ່າງກັນ ແລະມີອະນຸຍາດໃຫ້ປູກຕົ້ນໂພ ບໍ່ມີໃຫ້ສ້າງຮູບປັ້ນ
• ອຸດເທສິກະເຈດີ : ໃນພຣະໄຕປິດົກ ຂຽນໄວ້ຊັດເຈນວ່າບໍ່ແມ່ນວັດຖຸ "... ສຳລັບອຸດເທສິກະເຈດີກໍບໍ່ມີວັດຖຸປາກົດ ເປັນພຽງເນື່ອດ້ວຍຕະຖາຄົດເທົ່ານັ້ນ ..." ເມື່ອບໍ່ມີວັດຖຸປາກົດ ຈະເປັນການສ້າງຮູບປັ້ນໄດ້ແນວໃດ ເພາະຮູບປັ້ນກໍຄືວັດຖຸ

ເມື່ອຕ່າງກັນ ຈະຍົກມາທຽບໃສ່ບໍ່ໄດ້ ຮູບປັ້ນ ບໍ່ແມ່ນແມ້ແຕ່ພຣະທາດເຈດີ ປະຣິໂພກເຈດີ ແລະ ອຸດເທສິກະເຈດີ ເພາະພຣະພຸດທະເຈົ້າຕັດໄວ້ວ່າ ເຈດີມີ 3 ຢ່າງ ຮູບປັ້ນ ຈຶ່ງຫ່າງໄກຫຼາຍຈາກພຣະພຸດທະເຈົ້າ.