ດັ່ງປາກົດໃນເລື່ອງຜູ້ຍິງຂ້າຜ້າ ມີຊາຍຄົນໜຶ່ງປະພຶດມິດສາຈານຕໍ່ພັນລະຍາຂອງອ້າຍຕົນເອງ ພັນລະຍາຂອງອ້ານນັ້ນ ວາງແຜນໃຫ້ນ້ອງຊາຍຂ້າອ້າຍຕົນເອງ ອ້າຍທີ່ຖືກນ້ອງຊາຍຂ້ານັ້ນ ເມື່ຶອບໍ່ອາດສະລະຄວາມສິເນຫາໃນພັນລະຍາໄດ້ ຈຶ່ງໄປເກີດເປັນງູຂຽວໃຫຍ່ ໃນເຮືອນຫຼັງນັ້ນແຫຼະ ຜູ້ທີ່ເປັນພັນລະຍາເກົ່ານັ້ນ ຈະຢືນກໍຕາມນັ່ງກໍຕາມ ມັນຈະຕົກລົງທີ່ຕົວນາງ ຕໍ່ມານາງຈຶ່ງຂ້າງູນັ້ນ ໂດຍເຂົ້າໃຈວ່າ ຜົວຕົວເອງມາເກີດເປັນງູໂຕນີ້

ເພາະຄວາມຮັກນາງຜູ້ເປັນພັນລະຍາ ມັນຈຶ່ງໄປເກີດເປັນລູກໝາໃນເຮືອນຫຼັງນັ້ນອີກ ນັບແຕ່ເວລາທີ່ມັນຍ່າງໄດ້ ມັນຈະແລ່ນຕາມຫຼັງນາງໄປ ເຖິງແມ່ນວ່ານາງເຂົ້າໄປປ່າ ມັນກະຊິຕິດຕາມໄປນຳ ຄົນທັງຫຼາຍເຫັນນາງແລ້ວກໍເວົ້າເຍາະເຍີ້ຍວ່າພຣານໝາອອກແລ້ວ ຊິໄປໃສ ນາງຈຶ່ງສັ່ງໃຫ້ຂ້າມັນອີກ

ມັນຕາຍໄປກໍໄປເກີດເປັນລູກງົວໃນເຮືອນຫຼັງນັ້ນອີກ ແລ້ວຍ່າງຕາມຫຼັງນາງໄປແບບນັ້ນຄືກັນ ໃນຄາວນັ້ນ ຄົນທັງຫຼາຍເຫັນມັນແລ້ວກໍພາກັນເວົ້າເຍາະເຍີ້ຍວ່າ ໂຄບານ (ຄົນລ້ຽງງົວ) ອອກແລ້ວ ໂຄທັງຫຼາຍຊິໄປໃສ ນາງກໍສັ່ງໃຫ້ຂ້າມັນອີກ

ແລະຕອນນັ້ນມັນກໍບໍ່ສາມາດຕັດຄວາມສິເນຫາຕໍ່ນາງໄປໄດ້ ໃນວາລະທີ 4 ມັນໄດ້ເກີດໃນທ້ອງນາງແລ້ວລະນຶກຊາດໄດ້ ມັນເຫັນວ່າຕົນຖືກນາງຂ້າມາແລ້ວ 4 ອັດຕະພາບ ຕາມລຳດັບແລ້ວ ຄິດວ່າ ເຮົາເກີດໃນທ້ອງຂອງຜູ້ຍິງຜູ້ເປັນສັດຕູ ເຫັນປານນີ້ ນັບແຕ່ນັ້ນມາ ກໍບໍ່ຍອມໃຫ້ນາງເອົາມືແຕະຕ້ອງຕົວໄດ້ ຖ້ານາງແຕະຕ້ອງຕົວ ເຂົາຊິສະອຶກສະອື້ນຮ້ອງໃຫ້ ເວລານັ້ນ ຜູ້ເປັນຕາເທົ່ານັ້ນອູ້ມຊູເຂົາໄດ້

ຕໍ່ມາເຂົາຈະເລີນເຕີບໂຕແລ້ວ ຕາຈຶ່ງເວົ້າວ່າ ຫຼານເອີຍ ດ້ວຍເຫດໃດ ເຈົ້າຈຶ່ງບໍ່ຍອມໃຫ້ແມ່ເອົາມືແຕະຕ້ອງຕົວໄດ້ ຖ້າແມ່ແຕະຕ້ອງຕົວເຈົ້າ ເຈົ້າກໍຈະຮ້ອງໃຫ້ສະອຶກສະອື້ນສຽງດັງ ເຂົາໄດ້ບອກຄວາມເປັນໄປທັງໝົດນັ້ນວ່າ ຕາເອີຍ ຜູ້ນີ້ບໍ່ແມ່ນແມ່ຂອງຂ້ອຍ ແຕ່ເປັນສັດຕູ ຜູ້ເປັນຕາສວມກອດເຂົາໄວ້ ແລ້ວຮ້ອງໃຫ້ເວົ້າວ່າ ມາເຖີດຫຼານເອີຍ ພວກເຮົາຊິອາໄສຢູ່ກັບຄົນແບບນີ້ໄປເພື່ອຫຍັງ ຈຶ່ງພາຫຼານອອກຈາກບ້ານໄປສູ່ວິຫານແຫ່ງໜຶ່ງ ພາກັນບວດຢູ່ໃນວິຫານນັ້ນ ໄດ້ບັນລຸພຣະອໍຣະຫັນທັງສອງຄົນ.