ສິນຈັ່ງໃດກະເອີ້ນວ່າສິນ ມີຢູ່ໃນໂລກ ບໍ່ວ່າພຣະພຸດທະເຈົ້າຈະອຸບັດຂຶ້ນຫຼືຍັງບໍ່ອຸບັດຂຶ້ນກໍຕາມ ສິນບໍ່ໄດ້ມີຫຼັງຈາກທີ່ພຣະພຸດທະເຈົ້າບັນຍັດຂຶ້ນ ແຕ່ເມື່ອພຣະພຸດທະເຈົ້າອຸບັດຂຶ້ນແລ້ວ ພຣະພຸດທະເຈົ້າທັງຫຼາຍກໍດີ ພຣະສາວົກທັງຫຼາຍກໍດີ ຍ່ອມຊັກຊວນມະຫາຊົນຫ້ສະມາທານໃນສິນນັ້ນ ແລະໃນຂໍ້ປະຕິບັດເພື່ອເປັນພຣະພຸດທະເຈົ້າຂອງພຣະມະຫາໂພທິສັດ ກໍຕ້ອງມີສິນ ບັນລຸທັມໂດຍບໍ່ມີສິນ ເປັນໄປບໍ່ໄດ້.

ແລະຖ້າໃຜໄປຍັກເອົາກໍລະນີ ທີ່ພຣະພຸດທະເຈົ້າບາງພຣະອົງບໍ່ບັນຍັດວິໄນມາອ້າງວ່າ ວິໄນເປັນກາລິໂກ ບໍ່ເປັນອະກາລິໂກເໝືອນກັບທັມ ດ້ວຍເຫດພຽງແຕ່ບໍ່ບັນຍັດຂຶ້ນ ອັນນີ້ບໍ່ຖືກ ເພາະທັມແລະວິໄນອັນດຽວກັນ ພຣະພຸດທະເຈົ້າບັນຍັດວິໄນກໍເພື່ອໃຫ້ຮູ້ທັມ ບັນຍັດທັມກໍເພື່ອໃຫ້ຮູ້ວິໄນ ການລຶບລ້າງວິໄນຍ່ອມມີເພາະການລຶບລ້າງທັມ ການລຶບລ້າງທັມຍ່ອມມີເພາະການລຶບລ້າງວິໄນ

ທີ່ພຣະພຸດທະເຈົ້າບາງພຣະອົງບໍ່ບັນຍັດວິໄນກໍເພາະຊົງທໍ້ພຣະໄທເພື່ອຈະສະແດງທັມໂດຍພິສະດານແກ່ສາວົກທັງຫຼາຍ ແລະໃນຍຸກນັ້ນ ກໍເປັນເວໄນຊົນ ມີວິໄນຢູ່ແລ້ວ ຈຶ່ງບໍ່ບັນຍັດ ແຕ່ການບໍ່ບັນຍັດໃນບາງຍຸກບາງສະໄໝ ບໍ່ໄດ້ໝາຍຄວາມວ່າ ວິໄນຊິບໍ່ເປັນອະກາລິໂກ ແລະກໍບໍ່ແມ່ນວ່າບໍ່ເອີ້ນວ່າສິນພຽງເພາະບໍ່ບັນຍັດຂຶ້ນ.

ແຕ່ໃນຍຸກນີ້ ຍຸກຂາລົງ ພຣະພຸດທະເຈົ້າພຣະອົງນີ້ຊົງບັນຍັດໄວ້ຫຼາຍ ເພື່ອຄວາມດຳລົງຢູ່ຂອງພຣະສາດສະໜາ ເພາະຄົນຍຸກນີ້ຫຍາບ.