ໃນສິນ 5 ຂໍ້ໃດຮັກສາໄດ້ຍາກສຸດ ? ບໍ່ກ່ຽວກັບຕົວຂອງສິນ ກ່ຽວກັບສັດທາແລະປັນຍາຂອງຄົນ ເພາະຜູ້ມີສັດທາອ່ອນແລະປັນຍາອ່ອນ ເຖິງແມ່ນວ່າເປັັນໂທດພຽງອາບັດທຸກກົດ ກໍເປັນຂອງໃຫຍ່ ລະໄດ້ຍາກ ເໝືອນປາຣາຊິກ ແຕ່ເປັນຂອງງ່າຍສຳລັບຜູ້ທີ່ມີສັດທາຫຼາຍແລະປັນຍາຫຼາຍ.

ເພາະຄວາມດີຄົນດີເຮັດໄດ້ງ່າຍ ຄົນຊົ່ວເຮັດໄດ້ຍາກ ດັ່ງນັ້ນ ການຮັກສາສິນຍ່ອມເຮັດໄດ້ງ່າຍສຳລັບຄົນດີ ຍ່ອມຍາກສຳລັບຄົນຊົ່ວ

ທຽບຄຽງກັບເລື່ອງພິກຂຸ 5 ອົງທີ່ໂຕ້ຖຽງກັນວ່າຕົນຮັກສາທະວານທີ່ຮັກສາໄດ້ຍາກ ແຕ່ພຣະພຸດທະເຈົ້າແກ້ໃຫ້ວ່າ ທະວານເຫຼົ່ານັ້ນທັງໝົດເປັນສິ່ງທີ່ຮັກສາໄດ້ໂດຍຍາກເໝືອນກັນທັງນັ້ນ ບໍ່ກ່ຽວກັບຕົວທະວານ ດັ່ງນັ້ນ ບໍ່ວ່າສິນຂໍ້ໃດກໍຍ່ອມຮັກສາໄດ້ຍາກທັງນັ້ນ ບໍ່ກ່ຽວກັບຕົວຂອງສິນ ຖ້າຜູ້ນັ້ນບໍ່ມີອຸປະນິໄສໃນປາງກ່ອນ.

ການສັ່ງສົມກັມມາຕ່າງກັນ ເຊັ່ນ ບາງຄົນເກີດມາທຳງານຢູ່ໂຮງຂ້າສັດ ຂ້າສັດໝົດມື້ ການຮັກສາສິນຂໍ້ປານາຕິບາດກໍຍ່ອມເຮັດໄດ້ຍາກສຳລັບຜູ້ນັ້ນ ຫຼື ບາງຄົນສັ່ງສົມອຸປະນິໄສໂທສະມາຫຼາຍແຕ່ປາງກ່ອນ ທຳຮ້າຍຜູ້ອື່ນຫຼືຂ້າສັດເປັນຂອງເຮັດໄດ້ງ່າຍ ຈະໃຫ້ລະນັ້ນເປັນຂອງເຮັດໄດ້ຍາກ ແຕ່ທຽບໃສ່ອີກຄົນ ແມ້ແຕ່ມົດຕົວໜຶ່ງຍັງບໍ່ຈົງໃຈຂ້າເລີຍ ພັດເຮັດໄດ້ງ່າຍ ບາງຄົນເວົ້າອ່ອນຫວານໄດ້ຍາກ ແຕ່ທ້າວສັກກະເພິ່ນເຮັດໄດ້ງ່າຍ ດັ່ງນັ້ນ ເວລາທຽບ ກໍຢ່າທຽບເອົາສະເພາະກໍລະນີຂອງຕົນ.

ເຖິງແມ່ນວ່າຈະເຮັດແບບສອບຖາມຄົນທັງໂລກໃນຊາດນີ້ຈະໄດ້ຂໍ້ມູນໄປໃນແບບໃດກໍຕາມ ແຕ່ມັນກໍບໍ່ແນ່ນອນຢູ່ດີ ແລ້ວຊາດຕໍ່ໆໄປເດລະ ສົງສານກຳນົດທີ່ສຸດເບື້ອງຕົ້ນເບື້ອງປາຍບໍ່ໄດ້ ຍິ່ງແລ້ວຖ້າທຽບຄົນໃນຍຸກເສື່ອມລົງກັບຄົນໃນຍຸກຂາຈະເລີນຂຶ້ນທີ່ມີສິນ

ຄວາມເປັນຜູ້ມີສິນເຖິງພ້ອມຍ່ອມມີໄດ້ດ້ວຍເຫດ ໒ ປະການ ຄື ເພາະການເຫັນໂທດໃນການວິບັດແຫ່ງສິນ ໑ ເພາະເຫັນອານິສົງໃນການເຖິງພ້ອມແຫ່ງສິນ ໑ ກຸສົນລະທັມທັງປວງມີຄວາມບໍ່ປະໝາດເປັນມູນ