ສຳລັບຄຳຖາມທີ່ວ່າ "ສັ່ງຂ້າແຕ່ບໍ່ສຳເລັດບາບບໍ່ ?" ຕ້ອງເບິ່ງລາຍລະອຽດວ່າ ທີ່ວ່າ "ບໍ່ສຳເລັດ" ນັ້ນ ໝາຍຄວາມວ່າແນວໃດ (1) ທ້າວ (ກ) ສັ່ງທ້າວ (ຂ) ໃຫ້ໄປຂ້າທ້າວ (ຄ) ແຕ່ບໍ່ສຳເລັດ ເພາະມີຜູ້ມາຊ່ວຍທ້າວ (ຄ) ໄດ້ທັນ ເລີຍບໍ່ສຳເລັດ ຫຼື (2) ທ້າວ (ກ) ສັ່ງທ້າວ (ຂ) ໃຫ້ໄປຂ້າທ້າວ (ຄ) ແຕ່ທ້າວ (ຂ) ພັດໄປຂ້າທ້າວ (ງ) ເລີຍບໍ່ສຳເລັດ ເພາະຜິດເປົ້າໝາຍ.

ຖ້າເປັນກໍລະນີທີ (1) ຍັງບໍ່ເອີ້ນວ່າເປັນປານາຕິບາດ ແກ່ຜູ້ສັ່ງແລະຜູ້ຮັບສັ່ງ ແຕ່ກໍຍັງຂຶ້ນຊື່ວ່າ ປະສົບບາບບໍ່ແມ່ນບຸນເປັນອັນມາກ ຍົກເອົາຂໍ້ "ຂ້າສັດທຳບຸນໄດ້ບາບດ້ວຍເຫດ 5 ປະການ" ມາທຽບໄດ້ເລີຍ ພຣະພຸດທະເຈົ້າໃຫ້ລາຍລະອຽດໄວ້ດັ່ງນີ້ ຊິເຂົ້າຂໍ້ໃດແດ່ ກໍຂຶ້ນກັບສະຖານະການຄວາມເປັນຈິງນັ້ນໆ.

• ບອກໃຫ້ນຳສັດມາ ບາບໃນສ່ວນນີ້
• ຕອນນຳສັດມາ ສັດມັນມີຄວາມທຸກ ບາບໃນສ່ວນນີ້ອີກ
• ນຳມາແລ້ວບອກໃຫ້ຂ້າ ບາບໃນສ່ວນນີ້ອີກ
• ສັດທີ່ກຳລັງຖືກຂ້າຢູ່ນັ້ນເຈັບປວດເປັນທຸກ ບາບໃນສ່ວນນີ້ອີກ
• ໃຫ້ຕະຖາຄົດແລະສາວົກຕະຖາຄົດ ຍິນດີດ້ວຍເນື້ອທີ່ເປັນອະກັບປິຍະນັ້ນ ບາບໃນສ່ວນນີ້ອີກ

ຖ້າເປັນກໍລະນີທີ (2) ເປັນປານາຕິບາດ ແກ່ຜູ້ຮັບສັ່ງເທົ່ານັ້ນ ທີ່ໄປຂ້າຜິດຄົນເລີຍບໍ່ສຳເລັດ (ເປັນເລື່ອງທີ່ທ້່າວ ຂ ໄປຂ້າທ້າວ ງ ເອງ ບໍ່ກ່ຽວກັບທ້າວ ກ ເພາະບໍ່ໄດ້ສັ່ງໃຫ້ໄປຂ້າ ທ້າວ ງ) ດັ່ງນັ້ນ ຈຶ່ງບໍ່ເປັນປານາຕິບາດແກ່ຜູ້ສັ່ງ.

ຢ່າງໃດກໍຕາມ ເມື່ອທຽບກັບຂໍ້ "ຂ້າສັດທຳບຸນໄດ້ບາບດ້ວຍເຫດ 5 ປະການ" ດັ່ງທີ່ກ່າວໄວ້ໃນຂ້າງເທິງ ທ້າວ (ກ) ແລະ ທ້າວ (ຂ) ກໍຍັງຂຶ້ນຊື່ວ່າ ປະສົບບາບ ບໍ່ແມ່ນບຸນເປັນອັນມາກ ໃນຂໍ້ທີ່ໄປສັ່ງແລະຮັບສັ່ງຂ້າເປົ້າໝາຍທີ່ປະສົງໄວ້ຕັ້ງແຕ່ທຳອິດ ເຖິງແມ່ນວ່າຈະບໍ່ສຳເລັດກໍຕາມ.