#ດຳລັດວ່າດ້ວຍກົດຈະລາຈອນທາງບົກ ໜ້າ 9

ມາດຕາ 22 ການຈະລາຈອນຕາມທາງຫຼວງນອກເຂດຕົວເມືອງ ແລະ ທາງດ່ວນ

ການສັນຈອນຕາມທາງຫຼວງນອກເຂດຕົວເມືອງ ຫຼື ທາງດ່ວນ ທີ່ອະນຸຍາດໃຫ້ແລ່ນດ້ວຍຄວາມໄວສູງ ຜູ້ຂັບຂີ່ ຕ້ອງຂັບລົດແນບທາງກໍ້າຂວາຢູ່ສະເໝີ ແລະ ບໍ່ໃຫ້ແລ່ນຕາມຊ່ອງຈະລາຈອນຊ້າຍສຸດ ຖ້າຊ່ອງ ຈະລາຈອນ ກ້ຳຂວາຍັງຫວ່າງຢູ່.

ໃນເວລາທີ່ມີການສັນຈອນໜາແໜ້ນ ແລະ ຊ່ອງຈະລາຈອນເຕັມໝົດທຸກຊ່ອງ ອະນຸຍາດໃຫ້ປ່ຽນຊ່ອງ ຈະລາຈອນໄດ້ສະເພາະເວລາທີ່ຈະລ້ຽວຂວາ, ລ້ຽວຊ້າຍ, ລ້ຽວກັບ, ຢຸດລົດ ແລະ ຫຼົບຫຼີກສິ່ງກີດຂວາງ ເທົ່ານັ້ນ. ຜູ້ຂັບຂີ່ທີ່ຈະລ້ຽວ ຫຼື ປ່ຽນທິດທາງເດີນ ຕ້ອງໄດ້ເຂົ້າສູ່ຊ່ອງຈະລາຈອນ ກ່ອນຈະເຖິງຈຸດລ້ຽວ ຢ່າງໜ້ອຍ ໜຶ່ງຮ້ອຍຫ້າສິບ ແມັດ.

ການສັນຈອນຕາມທາງທີ່ມີ ສາມ ຊ່ອງຈະລາຈອນ ຂຶ້ນໄປ ທີ່ມີທິດທາງດຽວກັນ ໃຫ້ຈົ່ງຊ່ອງຈະລາຈອນ ຊ້າຍສຸດ ໄວ້ສໍາລັບລົດທີ່ຈະຊີງຂຶ້ນໜ້າ ເທົ່ານັ້ນ ແລະ ເມື່ອຊິງຂຶ້ນຫວິດແລ້ວ ກໍຕ້ອງກັບຄືນສູ່ຊ່ອງຈະລາຈອນ ເດີມ ຍົກເວັ້ນ ໃນເວລາການສັນຈອນໜາແໜ້ນ ແລະ ຊ່ອງທາງຈະລາຈອນອື່ນ ກໍເຕັມໝົດ.

ສໍາລັບລົດຂົນສົ່ງສິນຄ້າ ທີ່ມີນໍ້າໜັກລວມແຕ່ 3.500 ກິໂລກຣາມ ຂຶ້ນໄປ ແລະ ລົດຈັກ ໃຫ້ໃຊ້ຊ່ອງ ຈະລາຈອນ ຊ້າຍສຸດ ສະເພາະໃນກໍລະນີທີ່ກຽມ ລ້ຽວຊ້າຍ ຫຼື ລ້ຽວກັບ ໃນໄລຍະ ໜຶ່ງຮ້ອຍຫ້າສິບ ແມັດ ກ່ອນຮອດຈຸດລ້ຽວ ເທົ່ານັ້ນ.

ມາດຕາ 23 ການຈະລາຈອນຕາມທາງທີ່ມີສິ່ງກີດຂວາງ ແລະ ບໍ່ມີເສັ້ນແບ່ງໃຈກາງທາງ

ທາງທີ່ມີສອງຊ່ອງຈະລາຈອນ ທີ່ບໍ່ມີເສັ້ນແບ່ງໃຈກາງທາງ ຫຼື ດອນກາງທາງ ໃນກໍລະນີ ທີ່ມີເສົາ, ຫຼັກ ຫຼື ສິ່ງປະກອບຂອງສິ່ງປຸກສ້າງຕັ້ງຢູ່ກາງທາງ ຊຶ່ງບໍ່ມີປ້າຍຊີ້ບອກ ຜູ້ຂັບຂີ່ ຕ້ອງຂັບເວັ້ນໄປທາງຂວາ.

ໝວດທີ 2
ຄວາມໄວຂອງການຈະລາຈອນຕາມທາງຫຼວງ

ມາດຕາ 24 ຄວາມໄວ

ຜູ້ຂັບຂີ່ ຕ້ອງໃຊ້ຄວາມໄວບໍ່ເກີນປ້າຍຄວາມໄວ ທີ່ກໍານົດໄວ້ ໂດຍອີງຕາມຄວາມເໝາະສົມ ແລະ ສະພາບເຕັກນິກຂອງລົດ, ນໍ້າໜັກຂອງລົດທີ່ບັນທຸກ, ສະພາບໜ້າທາງ ແລະ ດິນຟ້າອາກາດ, ໄລຍະແນມເຫັນ ເພື່ອໃຫ້ສາມາດຄວບຄຸມລົດຂອງຕົນ ຢ່າງສະໝໍ່າສະເໝີ. ໃນກໍລະນີເກີດເຫດອັນຕະລາຍ ຜູ້ຂັບຂີ່ ຕ້ອງແກ້ໄຂ ດ້ວຍຕົນເອງ ໂດຍການຫຼຸດຜ່ອນຄວາມໄວລົງ ແລະ ຢຸດລົດ.

ມາດຕາ 25 ຄວາມໄວຈໍາກັດໃນເຂດຕົວເມືອງ ຫຼື ເຂດຊຸມຊົນ

ລົດທຸກປະເພດ ທີ່ແລ່ນຕາມທາງ ຕ້ອງແລ່ນດ້ວຍຄວາມໄວບໍ່ເກີນ ສີ່ສິບ ກິໂລແມັດຕໍ່ຊົ່ວໂມງ ໃນເຂດຕົວ ເມືອງ ແລະ ຊາວ ກິໂລແມັດຕໍ່ຊົ່ວໂມງ ຕາມທາງຮ່ອມ.

ໃນເຂດຊຸມຊົນທີ່ມີການຈະລາຈອນແອອັດ, ໜາແໜ້ນ ເປັນຕົ້ນ ສໍານັກງານ, ອົງການ, ຕະຫຼາດ, ສະຖານີ ລົດຂົນສົ່ງຜູ້ໂດຍສານ, ສະຖານການສຶກສາ, ໂຮງໝໍ ໃຫ້ຫຼຸດຜ່ອນຄວາມໄວຂອງລົດ ໂດຍອີງຕາມປ້າຍຈໍາກັດ ຄວາມໄວ ເເລະ ຕາມສະພາບຄວາມເປັນຈິງ.

ມາດຕາ 26 ຄວາມໄວຈໍາກັດຕາມທາງຫຼວງນອກເຂດຕົວເມືອງ

ການຈະລາຈອນນອກເຂດຕົວເມືອງ ອະນຸຍາດໃຫ້ນໍາໃຊ້ຄວາມໄວ ດັ່ງນີ້:

1. ປະເພດລົດເບົາ ໃຫ້ແລ່ນດ້ວຍຄວາມໄວບໍ່ເກິນ ເກົ້າສິບ ກິໂລແມັດຕໍ່ຊົ່ວໂມງ;