#ດຳລັດວ່າດ້ວຍກົດຈະລາຈອນທາງບົກ ໜ້າ 8

4. ຜູ້ຄວບຄຸມ, ເຈົ້າຂອງສັດ ຕ້ອງຮັບຜິດຊອບຕໍ່ຄວາມເສຍຫາຍ ທີ່ສັດໄດ້ກໍ່ຂຶ້ນ ໃນກໍລະນີເກີດ ອຸບປະຕິເຫດ ຍ້ອນສັດລ້ຽງຂອງຕົນ;

5. ຜູ້ຂີ່ສັດ, ຜູ້ຄວບຄຸມ ລໍ້ ຫຼື ກວຽນ ທີ່ລາກແກ່ດ້ວຍສັດ ເວລາຈະອອກຈາກຮ່ອມໄປສູ່ທາງໃຫຍ່ ທີ່ມີ ສິ່ງປິດບັງການແນມເຫັນ ຕ້ອງຈັບເຊືອກບັນຊາ ເພື່ອໃຫ້ສາມາດຄວບຄຸມສັດໄດ້ເປັນຢ່າງດີ.

ມາດຕາ 18 ການປ້ອງຝູງສັດລ້ຽງ

ຜູ້ປ້ອງຝູງສັດ ຂ້າມທາງ ຫຼື ທາງລົດໄຟ ຕ້ອງຄວບຄຸມຝູງສັດ ບໍ່ໃຫ້ເປັນກຸ່ມໃຫ່ຍ ຊຶ່ງອະນຸຍາດສະເພາະ ໃນຍາມກາງເວັນ ເທົ່ານັ້ນ ເພື່ອຮັບປະກັນຄວາມປອດໄພ.

ໃນກໍລະນີທີ່ມີການລ້ຽງສັດຢູ່ໃກ້ທາງ ຫຼື ມີການເຄື່ອນຍ້າຍສັດຕາມທາງ ຢ່າງເປັນປະຈໍາ ຕ້ອງມີ ປ້າຍເຕືອນໃຫ້ລະວັງສັດ ເພື່ອໃຫ້ຜູ້ຂັບຂີ່ມີຄວາມລະມັດລະວັງ. ໃນກໍລະນີເກີດອຸບປະຕິເຫດ ຢູ່ໃນເຂດທີ່ມີ ປ້າຍເຕືອນນັ້ນ ຜູ້ຂັບຂີ່ຕ້ອງຮັບຜິດຊອບຕໍ່ຜົນເສຍຫາຍທີ່ເກີດຂຶ້ນ.

ພາກທີ III
ລະບຽບການສະເພາະກ່ຽວກັບການຈະລາຈອນທາງບົກ
ໝວດທີ 1
ການຈະລາຈອນຕາມທາງຫຼວງ

ມາດຕາ 19 ການຈະລາຈອນຕາມທາງຫຼວງທີ່ມີ ແລະ ບໍ່ມີ ເສັ້ນແບ່ງຊ່ອງຈະລາຈອນ

ທາງທີ່ມີຊ່ອງຈະລາຈອນ ໃຫ້ຜູ້ຂັບຂີ່ຖືເອົາເສັ້ນແບ່ງຊ່ອງຈະລາຈອນ, ເຄື່ອງໝາຍ ແລະ ປ້າຍສັນຍານ ຈະລາຈອນ ເປັນຫຼັກ.

ທາງທີ່ບໍ່ມີ ເສັ້ນແບ່ງຊ່ອງຈະລາຈອນ, ເຄື່ອງໝາຍ ແລະ ປ້າຍສັນຍານ ຈະລາຈອນ ໃຫ້ຜູ້ຂັບຂີ່ເບິ່ງ ຕາມສະພາບຄວາມເປັນຈິງ ແລະ ຄວາມເໝາະສົມຂອງທາງ ໂດຍອີງໃສ່ຄວາມກວ້າງຂອງໜ້າທາງ, ຂະໜາດ ແລະ ໄລຍະຫ່າງທີ່ປອດໄພ ຂອງລົດ. ໃນກໍລະນີທາງທີ່ບໍ່ມີເສັ້ນແບ່ງໃຈກາງທາງ ໃຫ້ຖືເອົາໃຈກາງທາງ ເປັນເສັ້ນ ແບ່ງຊ່ອງຈະລາຈອນ ສໍາລັບການສວນທາງກັນ.

ມາດຕາ 20 ການຈະລາຈອນຕາມທາງຫຼວງ ທີ່ມີຫຼາຍຊ່ອງຈະລາຈອນ ສໍາລັບການສັນຈອນສອງທິດທາງ

ທາງທີມີ ສີ່ ຊ່ອງຈະລາຈອນ ຂຶ້ນໄປ ທີ່ມີການສັນຈອນສອງທິດທາງ ແລະ ມີການແບ່ງທິດທາງຈະລາຈອນ ດ້ວຍເສັ້ນແບ່ງໃຈກາງທາງເປັນເສັ້ນເຕັມຄູ່ນັ້ນ ແມ່ນບໍ່ອະນຸຍາດໃຫ້ລົດແລ່ນຂ້າມເສັ້ນດັ່ງກ່າວ ເພື່ອຊິງຂຶ້ນໜ້າຢ່າງເດັດຂາດ.

ໃນກໍລະນີ ທີ່ມີການລ້ຽວຊ້າຍ ຫຼື ລ້ຽວກັບນັ້ນ ອະນຸຍາດໃຫ້ລ້ຽວຢູ່ບ່ອນທາງຄົບ, ທາງແຍກ ຫຼື ບ່ອນທີ່ ບໍ່ມີປ້າຍຫ້າມ ແລະ ເຄື່ອງໝາຍຫ້າມລ້ຽວ ເທົ່ານັ້ນ.

ມາດຕາ 21 ການຈະລາຈອນຕາມທາງຫຼວງທີ່ມີເສັ້ນແບ່ງຊ່ອງຈະລາຈອນທີ່ຊັດເຈນ

ຜູ້ຂັບຂີ່ ຕ້ອງຂັບຂີ່ໄປຕາມຊ່ອງຈະລາຈອນທີ່ຊັດເຈນ, ບໍ່ໃຫ້ຂັບຂີ່ກວມ ຫຼື ຢຽບເສັ້ນແບ່ງຊ່ອງຈະລາຈອນ ຢ່າງເດັດຂາດ ຍົກເວັ້ນໃນເວລາຈະປ່ຽນຊ່ອງຈະລາຈອນ ເທົ່ານັ້ນ.