#ດຳລັດວ່າດ້ວຍກົດຈະລາຈອນທາງບົກ ໜ້າ 39

ມາດຕາ 147 ຂໍ້ຫ້າມສໍາລັບຜູ້ຂັບຂີ່ ລົດຖີບ ແລະ ລົດໂມເປດ

ຫ້າມຜູ້ຂັບຂີ່ ລົດຖີບ ແລະ ລົດໂມເປດ ມີພຶດຕິກໍາ ດັ່ງນີ້:

1. ປ່ອຍເຂົາລົດ ໃນເວລາຂັບຂີ່

2. ຊ້ອນທ້າຍ ໂດຍບໍ່ມີແຢ່ງຊ້ອນ ຫຼື ເອົາເດັກນ້ອຍຕໍ່າກ່ວາ ຫ້າປີ ຊ້ອນທ້າຍ ໂດຍບໍ່ມີເບາະນັ່ງສະເພາະ;

3. ບັນທຸກເຄື່ອງຂອງທີ່ມີຄວາມຍາວເກີນ ໜຶ່ງ ແມັດ ຈາກທ້າຍລົດ ແລະ/ຫຼື ຫົວລົດ, ມີຄວາມກວ້າງ ເກີນ ຂ້າງລະ ຫ້າສິບ ຊັງຕີແມັດ ຫຼື ບັນທຸກເຄື່ອງຂອງທີ່ກີດຂວາງການບັນຊາລົດ;

4. ຂັບຂີ່ລົດບໍ່ໃສ່ໝວກກັນກະທົບ ສໍາລັບລົດໂມເປດ;

5. ຂັບຂີ່ຕາມທາງມ້າລາຍ;

6. ຂັບຂີ່ລົດແກ່ກັນ ຍົກເວັ້ນແກ່ລໍ້ທີ່ບັນທຸກເຄື່ອງຂອງຮັບໃຊ້ ໃນການເດີນທາງໄກ ທີ່ອອກແບບໃຊ້ ສໍາລັບລົດຖີບ ຫຼື ລົດໂມເປດໂດຍສະເພາະ

7. ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ.

ພາກທີ X
ການຄຸ້ມຄອງ ແລະ ກວດກາ ວຽກງານກົດຈະລາຈອນທາງບົກ

ມາດຕາ 148 ອົງການຄຸ້ມຄອງ ແລະ ກວດກາ ວຽກງານກົດຈະລາຈອນທາງບົກ

ລັດຖະບານ ເປັນຜູ້ຄຸ້ມຄອງວຽກງານກົດຈະລາຈອນທາງບົກ ຢ່າງລວມສູນ ແລະ ເປັນເອກະພາບ ໃນຂອບເຂດທົ່ວປະເທດ ໂດຍມອບໃຫ້ກະຊວງໂຍທາທິການ ແລະ ຂົນສົ່ງ ເປັນຜູ້ຮັບຜິດຊອບໂດຍກົງ ທັງເປັນ ເຈົ້າການປະສານສົມທົບກັບ ກະຊວງປ້ອງກັນຄວາມສະຫງົບ, ບັນດາກະຊວງ, ອົງການອື່ນ ແລະ ອົງການປົກຄອງ ທ້ອງຖິ່ນ ທີ່ກ່ຽວຂ້ອງ.

ອົງການຄຸ້ມຄອງ ແລະ ກວດກາ ວຽກງານກົດຈະລາຈອນທາງບົກ ປະກອບມີ:

1. ກະຊວງໂຍທາທິການ ແລະ ຂົນສົ່ງ ແລະ ກະຊວງປ້ອງກັນຄວາມສະຫງົບ;

2. ພະແນກໂຍທາທິການ ແລະ ຂົນສົ່ງ ແລະ ກອງບັນຊາການປ້ອງກັນຄວາມສະຫງົບ ແຂວງ, ນະຄອນຫຼວງ;

3. ຫ້ອງການໂຍທາທິການ ແລະ ຂົນສົ່ງ ແລະ ກອງບັນຊາການປ້ອງກັນຄວາມສະຫງົບ ເມືອງ, ເທດສະບານ, ນະຄອນ;

4. ອົງການປົກຄອງບ້ານ.

ມາດຕາ 149 ສິດ ແລະ ໜ້າທີ່ ຂອງກະຊວງໂຍທາທິການ ແລະ ຂົນສົ່ງ

ໃນການຄຸ້ມຄອງວຽກງານກົດຈະລາຈອນທາງບົກ ກະຊວງໂຍທາທິການ ແລະ ຂົນສົ່ງ ມີ ສິດ ແລະ ໜ້າທີ່ຕາມຂອບເຂດຄວາມຮັບຜິດຊອບຂອງຕົນ ດັ່ງນີ້:

1. ຄົ້ນຄວ້າ ສ້າງ ແລະ ປັບປຸງ ລະບຽບການ ກ່ຽວກັບກົດຈະລາຈອນທາງບົກ ລວມທັງຜັນຂະຫຍາຍ ນະໂຍບາຍ, ແຜນຍຸດທະສາດ ແລະ ແຜນດໍາເນີນງານ ກ່ຽວກັບວຽກງານກົດຈະລາຈອນທາງບົກ;

2. ໂຄສະນາເຜີຍແຜ່ລະບຽບການ, ນະໂຍບາຍ, ແຜນຍຸດທະສາດ ແລະ ແຜນດໍາເນີນງານ ກ່ຽວກັບ ວຽກງານກົດຈະລາຈອນທາງບົກ ໃນຂອບເຂດທົ່ວປະເທດ;

3. ຕິດຕາມກວດກາການຕິດຕັ້ງ ແລະ ສ້ອມແປງປ້າຍ ເເລະ ເຄື່ອງໝາຍສັນຍານຈະລາຈອນທາງບົກ;