#ດຳລັດວ່າດ້ວຍກົດຈະລາຈອນທາງບົກ ໜ້າ 35

ໄຟສັນຍານລູກສອນ ສີຂຽວ ທີ່ຕິດເພີ່ມໃສ່ກັບໂຄມໄຟມົນ ສີຂຽວ ອະນຸຍາດໃຫ້ລ້ຽວໄປຕາມທິດທາງ ຂອງລູກສອນໄດ້ ແຕ່ຕ້ອງລະວັງ ຖ້າເປັນ ສີແດງ ໃຫ້ຢຸດ.

ມາດຕາ 137 ໄຟສັນຍານແບບສັນຍາລັກ

ໄຟສັນຍານທີ່ຮຸ່ງເປັນຮູບເຄື່ອນໄຫວຂອງຄົນ ຫຼື ລົດຖີບ ຈະມີຜົນບັງຄັບໃຊ້ສະເພາະກັບຄົນຍ່າງ ຫຼື ຜູ້ຂີ່ລົດຖີບ ເທົ່ານັ້ນ ຖ້າໄປຮຸ່ງເປັນ ສີຂຽວ ແມ່ນໃຫ້ໄປໄດ້ ຖ້າເປັນ ສີແດງ ໃຫ້ຢຸດ.

ໄຟສັນຍານ ສໍາລັບລົດຖີບສາມາດໃຊ້ໄຟສັນຍານ ສາມ ສີ ເເບບວົງມົນຄືກັບໄຟສັນຍານທົ່ວໄປ ແຕ່ ຕ້ອງໃຫ້ມີຂະໜາດນ້ອຍກວ່າ ແລະ ທາງດ້ານລຸ່ມ ຕ້ອງມີຮູບລົດຖີບຕິດໄວ້.

ມາດຕາ 138 ໄຟສັນຍານປະກອບສຽງ

ໄຟສັນຍານປະກອບສຽງ ນໍາໃຊ້ເພື່ອເຕືອນໃຫ້ຄົນພິການຕາ ໄດ້ຮູ້ກ່ຽວກັບເວລາທີ່ອະນຸຍາດໃຫ້ຂ້າມທາງ ຫຼື ເວລາມີໄຟຂຽວ ຕ້ອງຕິດຕັ້ງອຸບປະກອນສັນຍານດ້ວຍສຽງໃສ່ຕື່ມ.

ມາດຕາ 139 ໄຟສັນຍານຄວບຄຸມຊ່ອງຈະລາຈອນ

ການໃຫ້ສັນຍານເພື່ອຄວບຄຸມການສັນຈອນຕາມຊ່ອງຈະລາຈອນ ໂດຍສະເພາະຊ່ອງຈະລາຈອນ ທີ່ສາມາດ ປ່ຽນທິດທາງໄປ, ກັບໄດ້ ໃຫ້ນໍາໃຊ້ໄຟສັນຍານຮູບ ສີ່ ຫຼ່ຽມ ທີ່ມີແສງໄຟຮຸ່ງເປັນຮູບກາກະບາດ ໂຕ X ສີແດງ ແລະ ລູກສອນ ສີຂຽວ ຊີ້ລົງລຸ່ມ ເພື່ອອະນຸຍາດ ຫຼື ຫ້າມສັນຈອນຕາມຊ່ອງຈະລາຈອນ ທີ່ມີ ໄຟສັນຍານດັ່ງກ່າວ.

ໃນກໍລະນີຕ້ອງການເຕືອນໃຫ້ຜູ້ຂັບຂີ່ຮູ້ລ່ວງໜ້າ ໃຫ້ຕິດຕັ້ງໂຄມໄຟເປັນຮູບລູກສອນ ສີເຫຼືອງ ຊີ້ລົງລຸ່ມ ເປັນມູມຫງ່ຽງ ສີ່ສິບຫ້າ ອົງສາ ໄປທາງຊ້າຍ ຫຼື ຂວງ ເພື່ອເຕືອນໃຫ້ຜູ້ຂັບຂີ່ຮູ້ກ່ຽວກັບການປ່ຽນແປງ ຊ່ອງຈະລາຈອນ, ການເປີດ-ປິດ ຊ່ອງຈະລາຈອນ ຊຶ່ງຜູ້ຂັບຂີ່ ຕ້ອງປ່ຽນຊ່ອງຈະລາຈອນ ຕາມທິດຊີ້ບອກຂອງລູກສອນ.

ໃນກໍລະນີໄຟສັນຍານຄວບຄຸມຊ່ອງຈະລາຈອນບໍ່ຮຸ່ງ ບໍ່ອະນຸຍາດໃຫ້ຜູ້ຂັບຂີ່ເຂົ້າໄປໃນຊ່ອງຈະລາຈອນ ທີ່ມີໄຟສັນຍານດັ່ງກ່າວ.

ພາກທີ IX
ຂໍ້ຫ້າມ

ມາດຕາ 140 ຂໍ້ຫ້າມທົ່ວໄປ

ຫ້າມ ບຸກຄົນ, ນິຕິບຸກຄົນ ແລະ ການຈັດຕັ້ງ ມີພຶດຕິກໍາ ດັ່ງນີ້:

1. ທໍາລາຍ ປ້າຍ, ສັນຍານ, ເຄື່ອງໝາຍ ຈະລາຈອນ, ລວມທັງສ້າງສິ່ງເປີະເປື້ອນ ແລະ ປິດບັງປ້າຍສັນຍານຈະລາຈອນ;

2. ຕິດປ້າຍທະບຽນລົດ ທີ່ບໍ່ຖືກຕ້ອງຕາມລະບຽບການ;

3. ຕິດຕັ້ງປ້າຍໂຄສະນາ, ວາງເຄື່ອງຂາຍ, ຈັດພິທີ ຕາມທາງຫຼວງ, ເທິງທາງຍ່າງ ແລະ ເຂດສະຫງວນ ຂອງທາງ ໂດຍບໍ່ໄດ້ຮັບອະນຸຍາດ;

4. ຫຼີ້ນກິລາ ຕາມທາງຫຼວງ, ຖະໜົນ;

5. ກໍ່ສ້າງ, ຕໍ່ເຕີມ ອາຄານ, ສິ່ງປຸກສ້າງເຫຼື່ອມເອົາເຂດສະຫງວນຂອງທາງຫຼວງ, ຖະໜົນ;