#ດຳລັດວ່າດ້ວຍກົດຈະລາຈອນທາງບົກ ໜ້າ 32

ມາດຕາ 121 ລົດຕັກຊີ່

ລົດຕັກຊີ່ ຕ້ອງຕິດຕັ້ງເຄື່ອງຄິດໄລ່ເງິນ (Meter), ຕາຕະລາງອັດຕາຄ່າໂດຍສານສໍາລັບແຕ່ລະສາຍທາງ, ມີຮູບ, ຊື່, ທີ່ຢູ່ ແລະ ເບີໂທຕິດຕໍ່ຂອງຜູ້ຂັບຂີ່, ເທິງຫຼັງຄາ ຕ້ອງມີໂຄມໄຟທີ່ມີຕົວໜັງສື (TAXI) ເເລະ ທາງຂ້າງລົດ ຕ້ອງມີເຄື່ອງໝາຍສະມາຄົມ ຫຼື ບໍລິສັດ.

ພາກທີ VIII
ປ້າຍສັນຍານ, ເຄື່ອງໝາຍທາງ ແລະ ໄຟສັນຍານຈະລາຈອນ
ໝວດທີ 1
ປ້າຍສັນຍານຈະລາຈອນ

ມາດຕາ 122 ໝວດປ້າຍຈະລາຈອນ

ໝວດປ້າຍຈະລາຈອນ ມີ ດັ່ງນີ້:

1. ປ້າຍເຕືອນອັນຕະລາຍ (Warning Signs);

2. ປ້າຍບອກສິດ (Priority Signs):

3. ປ້າຍຫ້າມ (Prohibitory or Restrictive Signs);

4. ປ້າຍກໍານົດ ຫຼື ປ້າຍບັງຄັບ (Mandatory Signs);

5. ປ້າຍກໍານົດລະບຽບການສະເພາະ (Special Regulation Signs);

6. ປ້າຍແນະນໍາທາງ ຫຼື ທີ່ຕັ້ງ (Direction, Position or Indication Signs);

7. ປ້າຍບໍລິການ (Information, Facilities or Services Signs);

8. ປ້າຍເພີ່ມ (Additional Panels).

ສໍາລັບຮູບແບບ, ລັກສະນະ ແລະ ຄວາມໝາຍ ຂອງປ້າຍຈະລາຈອນ ໄດ້ກໍານົດໄວ້ໃນເອກະສານ ຊ້ອນທ້າຍ ຂອງດໍາລັດສະບັບນີ້.

ມາດຕາ 123 ປ້າຍເຕືອນອັນຕະລາຍ

ປ້າຍເຕືອນອັນຕະລາຍ ແມ່ນ ປ້າຍທີ່ນໍາໃຊ້ສໍາລັບເຕືອນຜູ້ຂັບຂີ່ໃຫ້ຊາບລ່ວງໜ້າ ກ່ຽວກັບສະພາບທາງ ມີການປ່ຽນແປງ, ອາດເປັນອັນຕະລາຍ, ມີການຄວບຄຸມການຈະລາຈອນຢູ່ຂ້າງໜ້າ ເພື່ອໃຫ້ຜູ້ຂັບຂີ່ ມີຄວາມ ລະມັດລະວັງ, ຫຼຸດຜ່ອນຄວາມໄວລົງ ຫຼື ປະຕິບັດຕາມສັນຍານຈະລາຈອນ ເພື່ອໃຫ້ຜ່ານບໍລິເວນເຫຼົ່ານັ້ນ ໄປດ້ວຍ ຄວາມປອດໄພ ແລະ ເຮັດໃຫ້ການຄວບຄຸມການຈະລາຈອນມີປະສິດທິພາບ.

ມາດຕາ 124 ປ້າຍບອກສິດ

ປ້າຍບອກສິດ ແມ່ນ ປ້າຍທີ່ນໍາໃຊ້ສໍາລັບການກໍານົດລະບຽບ ຫຼື ຄວບຄຸມການສັນຈອນ ຢູ່ຕາມ ທາງຄົບ, ທາງແຍກ ແລະ ບ່ອນທາງແຄບທີ່ລົດບໍ່ສາມາດສວນທາງກັນໄດ້ ໂດຍການກໍານົດບູລິມະສິດ ຫຼື ຈັດລໍາດັບ ຜູ້ໄປກ່ອນ ແລະ ນຳຫຼັງ.

ມາດຕາ 125 ປ້າຍຫ້າມ

ປ້າຍຫ້າມ ແມ່ນ ປ້າຍທີ່ນໍາໃຊ້ສໍາລັບກໍານົດລະບຽບການຈະລາຈອນ ຫຼື ຂໍ້ຈໍາກັດໃນການຈະລາຈອນ ລົດ ແລະ ຄົນ ຕາມທາງຫຼວງ ເພື່ອເຮັດໃຫ້ການຈະລາຈອນ ມີຄວາມເປັນລະບຽບຮຽບຮ້ອຍ, ສະດວກ ແລະປອດໄພ.