#ດຳລັດວ່າດ້ວຍກົດຈະລາຈອນທາງບົກ ໜ້າ 29

ມາດຕາ 105 ລົດຕິດຂັດຢູ່ເທິງທາງດ່ວນ

ໃນກໍລະນີຕ້ອງຢຸດລົດແບບສຸກເສີນຢູ່ເທິງທາງດ່ວນ ຜູ້ຂັບຂີ່ ຕ້ອງຊອກຫາວິທີເອົາລົດອອກຈາກ ແລວທາງການຈະລາຈອນໄປໄວ້ຢູ່ແຄມທາງ ຫຼື ຢູ່ນອກເສັ້ນຂອບທາງກ້ຳຂວາ ແລະ ປະຕິບັດຕາມລະບຽບ ທີ່ໄດ້ກໍານົດໄວ້ໃນມາດຕາ 43 ຂອງດໍາລັດສະບັບນີ້.

ໝວດທີ 2
ລະບຽບການເພີ່ມເຕີມສໍາລັບຜູ້ຂັບຂີ່ ລົດຈັກ, ລົດຖີບ ແລະ ລົດໂມເປດ

ມາດຕາ 106 ການຂັບຂີ່ລົດຈັກ

ເມື່ອສັນຈອນຕາມທາງຫຼວງ ຜູ້ຂັບຂີ່ລົດຈັກ ຕ້ອງຂັບຂີ່ໄປຕາມຊ່ອງຈະລາຈອນສໍາລັບລົດຈັກ, ຖ້າບໍ່ມີ ໃຫ້ຂັບຂີ່ ຢູ່ໃນຊ່ອງຈະລາຈອນຂວາສຸດ ບ່ອນທາງມີຫຼາຍຊ່ອງຈະລາຈອນ ຫຼື ລຽບຕາມຂອບທາງ ໃນໄລຍະ ບໍ່ເກີນ ໜຶ່ງແມັດຫ້າສິບ ຊັງຕີແມັດ ຈາກເສັ້ນຂອບທາງ ຫຼື ຈາກຂອບທາງປູຢາງ ຍົກເວັ້ນກໍລະນີຫຼົບຫຼີກ ສິ່ງກີດຂວາງ ຫຼື ຊິງຂຶ້ນໜ້າລົດຄັນອື່ນ.

ອະນຸຍາດໃຫ້ຂັບຂີ່ລົດຈັກຕາມຊ່ອງຈະລາຈອນຊ້າຍສຸດໄດ້ ໃນກໍລະນີຈະລ້ຽວຊ້າຍ ຫຼື ລ້ຽວກັບ ໄລຍະ ໜຶ່ງຮ້ອຍຫ້າສິບ ແມັດ ກ່ອນຮອດບ່ອນລ້ຽວ.

ມາດຕາ 107 ການຂັບຂີ່ລົດຖີບ ແລະ ລົດໂມເປດ

ຜູ້ຂີ່ລົດຖີບ ຕ້ອງມີອາຍຸ ແຕ່ ເກົ້າ ປີຂຶ້ນໄປ ແລະ ລົດໂມເປດ ຕ້ອງມີອາຍຸ ແຕ່ ສິບສອງ ປີຂຶ້ນໄປ ແລະ ການຂັບຂີ່ ໃຫ້ປະຕິບັດ ດັ່ງນີ້:

1. ຂັບຂີ່ແນວເຂົ້າແຄມທາງກໍ້າຂວາ ເປັນແຖວດຽວ;

2. ຂັບຂີ່ເປັນຂະບວນ ໃຫ້ຮຽງກັນໄດ້ ບໍ່ເກີນ ສອງ ຄັນ ແລະ ໃຫ້ແນບເຂົ້າແຄມທາງກ້ຳຂວາ.

ມາດຕາ 108 ການຂັບຂີ່ໃນເວລາຄ່ຳມືດ

ຜູ້ຂັບຂີ່ລົດຖີບ ແລະ ລົດໂມເປດ ໃນເວລາຄໍ່າມືດ ຕ້ອງໃສ່ເສື້ອຜ້າ ທີ່ມີສີແຈ້ງ ຫຼື ມີແຖບສະທ້ອນແສງ, ໄຕ້ໄຟ, ດອກໄຟ ຫຼື ແຜ່ນສະທ້ອນແສງຕິດລົດ ທາງດ້ານໜ້າເປັນ ສີເຫຼືອງ ຫຼື ຂາວ, ດ້ານຫຼັງເປັນ ສີແດງ ເພື່ອໃຫ້ຜູ້ຂັບຂີ່ອື່ນໄດ້ແນມເຫັນຢ່າງຊັດເຈນ.

ໝວດທີ 3
ລົດແກ່ກັນ

ມາດຕາ 109 ການແກ່ລົດ

ການແກ່ລົດດ້ວຍເຊືອກ, ໂສ້, ທ່ອນເຫຼັກ ລົດທີ່ຖືກແກ່ ຕ້ອງມີຜູ້ຂັບຂີ່ປະຈໍາຢູ່ ຍົກເວັ້ນກໍລະນີ ແກ່ດ້ວຍທ່ອນເຫຼັກທີ່ອອກແບບມາສະເພາະ ທີ່ສາມາດບັງຄັບໃຫ້ລົດທີ່ຖືກແກ່ບໍ່ໃຫ້ເຈືອກ ຊ້າຍ ຫຼື ຂວາ.

ໃນເວລາແກ່ລົດດ້ວຍເຊືອກ, ໂສ້ ຫຼື ທ່ອນເຫຼັກ ບໍ່ໃຫ້ມີຄົນໂດຍສານຢູ່ໃນລົດທີ່ຖືກແກ່ ນອກຈາກ ຜູ້ຂັບຂີ່. ໃນກໍລະນີແກ້ດ້ວຍວິທີຍົກສ່ວນໜ້າ ຫຼື ສ່ວນທ້າຍ ບໍ່ອະນຸຍາດໃຫ້ມີຄົນຢູ່ໃນລົດທີ່ຖືກແກ່.

ລົດທີ່ແກ່ກັນດ້ວຍເຊືອກ ຫຼື ໂສ້ ລະຫວ່າງລົດທີ່ແກ່ກັບລົດທີ່ຖືກແກ່ ຕ້ອງມີຄວາມຍາວ ຢູ່ໃນ ລະຫວ່າງ ສີ ຫາ ຫົກ ເມັດ, ຖ້າແກ່ດ້ວຍທ່ອນເຫຼັກ ຕ້ອງບໍ່ໃຫ້ເກີນ ສີ່ ແມັດ.