#ດຳລັດວ່າດ້ວຍກົດຈະລາຈອນທາງບົກ ໜ້າ 23

6. ໄຟຕາຫຼັງ ຫຼື ໄຟຖອຍຫຼັງ;

7. ໄຟຕາເພີ່ມ.

ມາດຕາ 81 ໄຟຕາໜ້າ ສໍາລັບເຍືອງທາງ

ລັກສະນະເຕັກນິກ ຂອງໄຟຕາລົດ ມີແສງສະຫວ່າງເປັນສີຂາວ ຫຼື ສີເຫຼືອງ, ຄວາມເຂັ້ມຂອງແສງສະຫວ່າງ ຖືກຕ້ອງຕາມມາດຕະຖານຂອງໂຮງງານຜະລິດ ແລະ ຕາມມາດຕະຖານຂອງກະຊວງໂຍທາທິການ ແລະ ຂົນສົ່ງວາງອອກ.

ໄຟຕາໜ້າສໍາລັບເຍືອງທາງ ປະກອບມີ ໄຟຕາຕໍ່າ ແລະ ໄຟຕາສູງ ຊຶ່ງຕ້ອງໃຊ້ຕາມແຕ່ລະກໍລະນີ ດັ່ງນີ້:

1. ໃຊ້ໄຟຕາຕໍ່າ ໃນເວລາສັນຈອນໃນຍາມກາງຄືນ ຢູ່ຕາມທາງຫຼວງ ແລະ ໃຊ້ໃນເວລາກາງເວັນ ໃນ ກໍລະນີອາກາດມືດມົວ, ມີໝອກໜາ, ຄວັນ, ຝົນຕົກແຮງ, ທາງມີຂີ້ຝຸ່ນປິວຂຶ້ນຫຼາຍ, ລົດແລ່ນເປັນຂະບວນ, ລົດຂົນສົ່ງ ວັດຖຸອັນຕະລາຍ, ສິນຄ້າ, ເຄື່ອງຂອງທີ່ມີ ນໍ້າໜັກເກີນ ແລະ ຂະໜາດໃຫຍ່, ລົດຮັບ, ສົ່ງ ເດັກນ້ອຍ, ລົດແກ່ກັນ, ລົດສຸກເສີນ ແລະ ນໍາສົ່ງຄົນເຈັບ.

2. ໃຊ້ໄຟຕາສູງ ໃນເວລາສັນຈອນໃນຍາມກາງຄືນ ຢູ່ທາງຫຼວງນອກຕົວເມືອງ, ໃນເວລາທີ່ບໍ່ໄດ້ແລ່ນ ຕາມຫຼັງລົດຄັນອື່ນ ແລະ ບໍ່ມີລົດຄັນອື່ນແລ່ນສວນທາງມາ, ບໍ່ອະນຸຍາດໃຫ້ໃຊ້ໄຟຕາສູງໃນຕົວເມືອງ.

ໃນເມື່ອມີລົດສວນທາງມາໃນໄລຍະບໍ່ຫຼຸດ ໜຶ່ງຮ້ອຍຫ້າສິບ ແມັດ ຫຼື ໃນເມື່ອລົດສວນທາງມາ ໃຫ້ ສັນຍານເຕືອນດ້ວຍການກົດໄຟຕາຕ່ຳ, ຕາສູງ ສະຫຼັບກັນ ແລະ ເວລາແລ່ນຕາມຫຼັງລົດຄັນອື່ນ ຕ້ອງປ່ຽນເປັນ ໄຟຕາຕໍ່າ. ຖ້າເກີດມີອາການເຫຼື້ອມຕາ ຫຼື ຝາງຕາ ຈາກແສງໄຟລົດທີ່ສວນທາງມາ ຜູ້ຂັບຂີ່ ຕ້ອງເປີດໄຟ ສັນຍານສຸກເສີນ, ຮັກສາແລວທາງເດີມ, ຜ່ອນຄວາມໄວ ແລະ ຖ້າຈໍາເປັນກໍໃຫ້ຢຸດລົດ.

ສໍາລັບຍານພາຫະນະ ທີ່ມີລະບົບໄຟຕາເປີດອັດຕະໂນມັດ ສາມາດນໍາໃຊ້ໄດ້ ໃນການສັນຈອນຕາມທາງຫຼວງ.

ມາດຕາ 82 ໄຟສັນຍານ

ໄຟສັນຍານມີແສງສະຫວ່າງກະພິບເປັນສີເຫຼືອງພ້ອມກັນທາງດ້ານໜ້າ ແລະ ດ້ານຫຼັງ ຊຶ່ງປະກອບດ້ວຍ ໄຟສັນຍານລ້ຽວ ເມື່ອໄຟສັນຍານທາງດ້ານໜ້າໜຶ່ງດອກ ແລະ ດ້ານຫຼັງໜຶ່ງດອກ ເບື້ອງໃດເບື້ອງໜຶ່ງຮຸ່ງກະພິບ ພ້ອມກັນ ແລະ ສຸກເສີນ ເມື່ອໄຟສັນຍານທັງ ສີ່ ດອກ ດ້ານໜ້າ ສອງ ແລະ ດ້ານຫຼັງ ສອງ ດອກ ຮຸ່ງກະພິບ ພ້ອມກັນ.

ການນໍາໃຊ້ໄຟສັນຍານລ້ຽວ ໃຫ້ໃຊ້ໃນເວລາ ຈະລ້ຽວ ຫຼື ປ່ຽນທິດທາງ, ເວລາຈະຊີງຂຶ້ນໜ້າ, ອອກລົດ ຫຼື ຈອດລົດ.

ການນໍາໃຊ້ໄຟສັນຍານສຸກເສີນ ໃຫ້ໃຊ້ໄດ້ສະເພາະໃນກໍລະນີມີເຫດສຸກເສີນ ຕາມທີ່ກໍານົດໄວ້ໃນ ມາດຕາ 67 ຂອງດໍາລັດສະບັບນີ້.

ມາດຕາ 83 ໄຟຫ້າມລໍ້

ໄປຫ້າມລໍ້ ຕ້ອງມີແສງສະຫວ່າງເປັນສີແດງ ເທົ່ານັ້ນ ແລະ ໃຊ້ໃນເວລາຈະຢຸດລົດ ຫຼື ຈະຜ່ອນຄວາມໄວ ເພື່ອເຕືອນໃຫ້ຜູ້ຂັບຂີ່ທີ່ແລ່ນມາຕາມຫຼັງຮູ້ ແລະ ບໍ່ອະນຸຍາດໃຫ້ນໍາໃຊ້ໄຟຫ້າມລໍ້ຮຸ່ງແບບກະພິບ.

ມາດຕາ 84 ໄຟຕາຫຼີ່

ໄຟຕາຫຼີ່ ໃຫ້ດ້ານໜ້າມີສະແສງຫວ່າງເປັນສີຂາວ ຫຼື ສີເຫຼືອງ, ໃຫ້ດ້ານຫຼັງມີແສງສະຫວ່າງເປັນສີແດງ ແລະ ໃຊ້ໃນເວລາຈອດລົດຢູ່ຕາມແຄມທາງ ໃນຍາມກາງຄືນ ແລະ ຍາມກາງເວັນໃນເວລາທີ່ມີອາກາດມືດມົວ.