#ດຳລັດວ່າດ້ວຍກົດຈະລາຈອນທາງບົກ ໜ້າ 22

ໃນກໍລະນີທີ່ມີລົດສອງຄັນມາຈາກທິດທາງຕ່າງກັນ, ຈະລ້ຽວຊ້າຍຄືກັນ ແລະ ທິດທາງເດີນລົດ ຕັດກັນນັ້ນ ໃຫ້ລົດທີ່ຢູ່ທາງກ້ຳຂວາ ມີສິດໄປກ່ອນ.

ມາດຕາ 77 ຊ່ອງຈະລາຈອນສໍາລັບ ຜ່ອນ ແລະ ເພີ່ມ ຄວາມໄວ

ຜູ້ຂັບຂີ່ ທີ່ມີຈຸດປະສົງຈະລ້ຽວຂວາ ຢູ່ບ່ອນທາງແຍກທີ່ຢູ່ທາງໜ້າ ຕ້ອງເຂົ້າສູ່ຊ່ອງຈະລາຈອນສະເພາະ ທີ່ກໍານົດໄວ້ ເພື່ອຫຼຸດຜ່ອນຄວາມໄວລົງແລ້ວ ຈຶ່ງລ້ຽວຂວາໄດ້.

ຜູ້ຂັບຂີ່ ທີ່ມີຈຸດປະສົງຈະເຂົ້າສູ່ຊ່ອງຈະລາຈອນທີ່ໃຊ້ຄວາມໄວສູງ ຕ້ອງເຂົ້າຊ່ອງຈະລາຈອນສະເພາະ ທີ່ກໍານົດໄວ້ແລ້ວ ຈຶ່ງເພີ່ມຄວາມໄວໃຫ້ສູງຂຶ້ນ ທຽບເທົ່າກັບຄວາມໄວຂອງລົດ ທີ່ແລ່ນຢູ່ຊ່ອງຈະລາຈອນ ປົກກະຕິ ທີ່ຢູ່ກ້ຳຊ້າຍຂອງຕົນ ແລະ ຕ້ອງປ່ອຍທາງໃຫ້ລົດທີ່ແລ່ນຕາມຊ່ອງຈະລາຈອນ ທີ່ຕົນຈະແລ່ນເຂົ້ານັ້ນໄປກ່ອນ.

ມາດຕາ 78 ບ່ອນທີ່ບໍ່ອະນຸຍາດໃຫ້ລົດລ້ຽວກັບ

ບ່ອນທີ່ບໍ່ອະນຸຍາດໃຫ້ລົດລ້ຽວກັບ ມີ ດັ່ງນີ້:

1. ທາງມ້າລາຍ;

2. ໃນອຸໂມງ;

3. ເທິງຂົວ, ກ້ອງຂົວ;

4. ບ່ອນຂ້າມທາງລົດໄຟ;

5. ບ່ອນທີ່ບໍ່ສາມາດແນມເຫັນໄດ້ດີ ໃນໄລຍະທາງໜ້ອຍກວ່າ ໜຶ່ງຮ້ອຍ ແມັດ;

6. ບ່ອນຢຸດລົດປະຈໍາທາງ;

7. ທາງໂຄ້ງ, ທາງຄ້ອຍ, ທາງຊັນ, ທາງແຄບ;

8. ບ່ອນທີ່ມີປ້າຍຫ້າມລ້ຽວກັບ.

ມາດຕາ 79 ການຖອຍລົດ

ຜູ້ຂັບຂີ່ ທີ່ມີຈຸດປະສົງຖອຍລົດອອກຈາກ ເຮືອນ, ອາຄານ ຫຼື ສະຖານທີ່ໃດໜຶ່ງ ເພື່ອເຂົ້າສູ່ທາງ ຕ້ອງມີ ຜູ້ຊ່ວຍສັນຍານໃນເວລາຖອຍ ເພື່ອຮັບປະກັນຄວາມປອດໄພ ແລະ ບໍ່ໃຫ້ກີດຂວາງການສັນຈອນຂອງລົດຄັນອື່ນ.

ບໍ່ອະນຸຍາດ ໃຫ້ຜູ້ຂັບຂີ່ ຖອຍລົດ ຢູ່ບ່ອນທາງແຍກ ແລະ ຕາມທີ່ໄດ້ກໍານົດໄວ້ໃນມາດຕາ 78 ຂອງ ດໍາລັດສະບັບນີ້.

ພາກທີ V
ລະບົບ ໄຟສະຫວ່າງ, ໄຟສັນຍານ ແລະ ສັນຍານສຽງແກ ຂອງລົດ

ມາດຕາ 80 ລະບົບໄຟສະຫວ່າງຂອງລົດ

ໄຟຕາລົດ ປະກອບມີ ດັ່ງນີ້:

1. ໄຟຕາໜ້າ ສໍາລັບເຍືອງທາງ;

2. ໄຟສັນຍານ ປະກອບດ້ວຍ ສັນຍານລ້ຽວ ແລະ ສັນຍານສຸກເສີນ;

3. ໄຟຫ້າມລໍ້;

4. ໄຟຕາຫຼີ;

5. ໄຟເຍືອງປ້າຍທະບຽນລົດ;