#ດຳລັດວ່າດ້ວຍກົດຈະລາຈອນທາງບົກ ໜ້າ 21

ມາດຕາ 71 ການເລີ່ມອອກລົດ ແລະ ລ້ຽວລົດ

ກ່ອນເລີ່ມອອກລົດ ຜູ້ຂັບຂີ່ ຕ້ອງເປີດໄຟສັນຍານ ຫຼື ໃຫ້ສັນຍານດ້ວຍມື ຢ່າງໜ້ອຍ ຫ້າ ວິນາທີ ແລະ ເມື່ອລົດອອກສູ່ທາງການສັນຈອນແລ້ວ ຕ້ອງປິດໄຟສັນຍານ.

ກອນລ້ຽວລົດ ຜູ້ຂັບຂີ່ຕ້ອງເປີດໄຟສັນຍານ ຫຼື ໃຫ້ສັນຍານດ້ວຍມືລ່ວງໜ້າ ຢ່າງໜ້ອຍ ໃນໄລຍະທາງ ສາມສິບ ແມັດ ກ່ອນເຖິງຈຸດລ້ຽວ ແລະ ຕ້ອງປິດໄຟທັນທີ ເມື່ອສິ້ນສຸດການລ້ຽວ.

ການເປີດໄຟລ້ຽວ ຫຼື ໃຫ້ສັນຍານລ້ຽວດ້ວຍມື ຕ້ອງໃຫ້ຖືກຕ້ອງ ແລະ ຊັດເຈນ ຕາມທິດທາງທີ່ຈະໄປ ດ້ວຍຄວາມລະມັດລະວັງ ເພື່ອບໍ່ເຮັດໃຫ້ຜູ້ຂັບຂີ່ອື່ນເກີດຄວາມສັບສົນ.

ມາດຕາ 72 ການອອກລົດເຂົ້າສູ່ທາງ

ການຂັບລົດອອກຈາກບ່ອນຈອດລົດ ເປັນຕົ້ນ ປໍ້ານໍ້າມັນ, ສໍານັກງານອົງການ, ເຮືອນ, ອາຄານ ເພື່ອ ເຂົ້າສູ່ທາງໃຫຍ່ ຜູ້ຂັບຂີ່ ຕ້ອງເປີດໄຟສັນຍານລ້ຽວຕາມທິດທາງທີ່ຈະໄປ ເເລະ ປ່ອຍໃຫ້ລົດ, ຄົນຍ່າງ ທີ່ສັນຈອນ ຕາມທິດທາງນັ້ນໄປກ່ອນ.

ມາດຕາ 73 ການປ່ຽນຊ່ອງຈະລາຈອນ

ກ່ອນຈະປ່ຽນຊ່ອງຈະລາຈອນ ຜູ້ຂັບຂີ່ ຕ້ອງເປີດໄຟສັນຍານ ແລະ ປ່ອຍໃຫ້ລົດທີກໍາລັງແລ່ນຕາມ ຊ່ອງຈະລາຈອນດ້ານຂ້າງຂອງຕົນ ກາຍໄປກ່ອນ. ໃນກໍລະນີລົດປ່ຽນຊ່ອງຈະລາຈອນສະຫຼັບກັນ ຕ້ອງປ່ອຍ ໃຫ້ລົດທີ່ຢູ່ກ້ຳຂວາ ປ່ຽນໄປກ່ອນ.

ມາດຕາ 74 ການລ້ຽວລົດ

ກ່ອນຈະລ້ຽວລົດໄປກໍ້າຂວາ ຜູ້ຂັບຂີ່ ຕ້ອງແນບລົດເຂົ້າແຄມທາງກ້ຳຂວາ ຫຼື ຂະໜານກັບຂອບທາງ; ການລ້ຽວຂວາສູ່ທາງໃຫຍ່ ຕ້ອງໃຫ້ຢູ່ໃນຊ່ອງຈະລາຈອນກໍ້າຂວາ ຫຼື ແນບຂວາ ເມື່ອເຂົ້າສູ່ການສັນຈອນ ປົກກະຕິແລ້ວ ຈຶ່ງສາມາດປ່ຽນຊ່ອງຈະລາຈອນໄດ້.

ກ່ອນຈະລ້ຽວລົດໄປກ້ຳຊ້າຍ ຫຼື ລ້ຽວກັບ ຜູ້ຂັບຂີ່ ຕ້ອງແນບລົດເຂົ້າຫາເສັ້ນແບ່ງໃຈກາງທາງ ຫຼື ດອນກາງ ກ່ອນຈະເຖິງບ່ອນລ້ຽວ ປະມານ ໜຶ່ງຮ້ອຍຫ້າສິບ ແມັດ ຫຼື ຕາມເສັ້ນແບ່ງຊ່ອງຈະລາຈອນປົກກະຕິ, ຕາມທີ່ ໄດ້ກໍານົດໄວ້ ຍົກເວັ້ນບ່ອນທາງຄົບ, ທາງແຍກ ທີ່ເປັນວົງວຽນ.

ຜູ້ຂັບຂີ່ ທີ່ຕ້ອງການລ້ຽວຊ້າຍເຂົ້າສູ່ທາງສັນຈອນຂ້າງໜ້າ ຕ້ອງລະວັງບໍ່ ໃຫ້ລ້ຽວຕັດແລວທາງການ ສັນຈອນຂອງລົດ ທີ່ມາທາງກໍ້າຊ້າຍ, ໃຫ້ລ້ຽວໂຄ້ງອ້ອມຈຸດໃຈກາງຂອງທາງແຍກ.

ມາດຕາ 75 ການລ້ຽວກັບຂອງລົດຂົນສົ່ງຜູ້ໂດຍສານ, ສິນຄ້າ ເກີນຂະໜາດ

ລົດທີ່ບໍ່ສາມາດລ້ຽວໄດ້ຕາມທີ່ໄດ້ກໍານົດໄວ້ໃນ ມາດຕາ 74 ຂອງດໍາລັດສະບັບນີ້ ຍ້ອນຄວາມໃຫຍ່, ຄວາມຍາວ ຫຼື ເຫດຜົນອື່ນ ອະນຸຍາດໃຫ້ລ້ຽວກັບຈາກຊ່ອງຈະລາຈອນອື່ນຕາມຄວາມເໝາະສົມ ແຕ່ຕ້ອງ ຮັບປະກັນໃຫ້ມີຄວາມປອດໄພ ແລະ ບໍ່ກີດຂວາງການສັນຈອນຂອງລົດຄັນອື່ນ.

ມາດຕາ 76 ການລ້ຽວລົດຢູ່ນອກເຂດທາງແຍກ

ຜູ້ຂັບຂີ່ ຕ້ອງການລ້ຽວຊ້າຍ ຫຼື ລ້ຽວກັບ ຢູ່ນອກເຂດທາງແຍກ ຕ້ອງປ່ອຍທາງໃຫ້ລົດທີ່ສວນທາງມາ ໄປກ່ອນ, ຖ້າຈະລ້ຽວກັບຢູ່ນອກເຂດທາງແຍກ ຈາກຊ່ອງຈະລາຈອນຊ້າຍສຸດທີ່ມີໜ້າທາງບໍ່ກວ້າງພຽງພໍ ສາມາດ ໃຫ້ລ້ຽວກັບຈາກແຄມທາງກ້ຳຂວາສຸດ. ໃນກໍລະນີຂອງການລ້ຽວດັ່ງກ່າວ ຜູ້ຂັບຂີ່ ຕ້ອງປ່ອຍໃຫ້ລົດທີ່ແລ່ນ ຕາມຫຼັງ ແລະ ລົດທີ່ສວນທາງມາ ໄປກ່ອນ ຈຶ່ງລ້ຽວໃຫ້ສໍາເລັດບາດດຽວ.