#ດຳລັດວ່າດ້ວຍກົດຈະລາຈອນທາງບົກ ໜ້າ 20

ມາດຕາ 66 ການໃຫ້ສັນຍານດ້ວຍອຸບປະກອນ, ເຄື່ອງໝາຍ ແລະ ປ້າຍສັນຍານ

ຜູ້ຂັບຂີ່ ຕ້ອງໃຫ້ສັນຍານດ້ວຍ ອຸບປະກອນ, ເຄື່ອງໝາຍ ແລະ ປ້າຍສັນຍານ ໃນກໍລະນີ ດັ່ງນີ້:

1. ນໍາໃຊ້ສັນຍານໄຟສຸກເສີນ ແລະ ປ້າຍສາມຫຼ່ຽມເຕືອນເຫດສຸກເສີນພ້ອມກັນ ໃນກໍລະນີເກີດ ອຸບປະຕິເຫດ ຫຼື ຂັດຂ້ອງທາງດ້ານເຕັກນິກ;

2. ມີຄວາມຈໍາເປັນຕ້ອງຈອດລົດຢູ່ບ່ອນຫ້າມຈອດ ຫຼື ບ່ອນທີ່ມີການແນມເຫັນຈໍາກັດ. ການວາງປ້າຍສາມຫຼ່ຽມເຕືອນເຫດສຸກເສີນ ຕ້ອງຫ່າງຈາກລົດຢ່າງໜ້ອຍ ສິບຫ້າ ແມັດ ສໍາລັບຖະໜົນ ໃນຕົວເມືອງ ແລະ ສາມສິບ ແມັດ ສໍາລັບທາງຫຼວງນອກຕົວເມືອງ.

ມາດຕາ 67 ການນໍາໃຊ້ໄຟສັນຍານສຸກເສີນຂອງລົດ

ຜູ້ຂັບຂີ່ຕ້ອງເປີດໄຟສັນຍານສຸກເສີນໃນກໍລະນີ ດັ່ງນີ້:

1. ເກີດອຸບປະຕິເຫດ;

2. ຈໍາເປັນຕ້ອງຈອດລົດຢູ່ບ່ອນຫ້າມຈອດ ໃນກໍລະນີຈໍາເປັນຕ້ອງໄດ້ຈັດລະບຽບເຄື່ອງຂອງ ທີ່ບັນທຸກມາ, ລົດເກີດຂັດຂ້ອງທາງດ້ານເຕັກນິກ ແລະ ຜູ້ຂັບຂີ່ເຈັບປ່ວຍກະທັນຫັນ;

3. ຢຸດລົດຍ້ອນຕາຟາງຈາກແສງໄຟລົດສວນທາງມາ;

4. ເວລາລົດແກ່ກັນ, ຄັນທີ່ຖືກແກ່ໃຫ້ເປີດໄຟສັນຍານສຸກເສີນ;

5. ເວລາເອົາເດັກນ້ອຍ ຂຶ້ນ, ລົງລົດ ສໍາລັບລົດຮັບສົ່ງເດັກນ້ອຍນັກຮຽນ.

ນອກຈາກນີ້ ຜູ້ຂັບຂີ່ ຕ້ອງເປີດໄຟສັນຍານສຸກເສີນ ເພື່ອເຕືອນໃຫ້ຜູ້ຂັບຂີ່ອື່ນມີສະຕິລະວັງຕົວ ເມື່ອມີ ສະພາບອັນຕະລາຍ ທີ່ອາດມີຜົນກະທົບຕໍ່ຍານພາຫະນະຂອງບຸກຄົນອື່ນ.

ມາດຕາ 68 ການປະກອບອຸບປະກອນ, ເຄື່ອງໝາຍ ແລະ ປ້າຍສັນຍານ

ລົດສີ່ລໍ້ທຸກປະເພດ ຕ້ອງມີປ້າຍສາມຫຼຽມສະທ້ອນແສງຕິດລົດໄວ້ ສອງ ອັນ, ສໍາລັບລົດ ຫົກລໍ້ ຂຶ້ນໄປ ຕ້ອງມີຈວຍຢາງສະທ້ອນແສງ ຈໍານວນ ສອງ ອັນ ເພື່ອນໍາໃຊ້ເຕືອນ ແລະ ປ້ອງກັນຄວາມປອດໄພ ໃນເວລາ ລົດຕິດຂັດ, ເກີດອຸບປະຕິເຫດ, ເກີດການຂັດຂ້ອງທາງດ້ານເຕັກນິກຕ່າງໆ.

ມາດຕາ 69 ການເຕືອນເຫດສຸກເສີນສໍາລັບລົດແກ່ກັນ

ສໍາລັບລົດແກ່ກັນ, ລົດທີ່ຖືກແກ່ ຕ້ອງເປີດໄຟສັນຍານເຕືອນອັນຕະລາຍ, ໃນກໍລະນີໄຟສັນຍານເຕືອນ ອັນຕະລາຍຫາກໃຊ້ບໍ່ໄດ້ ໃຫ້ຕິດປ້າຍສາມຫຼ່ຽມເຕືອນອັນຕະລາຍ ໃສ່ທ້າຍລົດໄວ້.

ໝວດທີ 4
ການນໍາໃຊ້ສັນຍານເຕືອນ

ມາດຕາ 70 ການນໍາໃຊ້ໄຟສັນຍານເລີ່ມຕົ້ນເຄືີ່ອນລົດ ແລະ ການປ່ຽນທິດທາງຂອງລົດ

ກ່ອນເລີ່ມ ການສັນຈອນ, ປ່ຽນທິດທາງເດີນ, ລ້ຽວຂວາ, ລ້ຽວຊ້າຍ, ລ້ຽວກັບ ແລະ ຢຸດລົດ ຜູ້ຂັບຂີ່ ຕ້ອງເປີດໄຟສັນຍານລ້ຽວ ໃຫ້ສອດຄ່ອງກັບທິດທາງຈະໄປ ຫຼື ຢຸດລົດ. ໃນກໍລະນີໄຟສັນຍານບໍ່ມີ ຫຼື ໃຊ້ບໍ່ໄດ້ ໃຫ້ສັນຍານດ້ວຍມື ກ່ອນຈະລ້ຽວ ຫຼື ປ່ຽນທິດທາງ. ເມື່ອເປີດໄຟສັນຍານ ຫຼື ໃຫ້ສັນຍານດ້ວຍມືແລ້ວ ຕ້ອງໃຫ້ ແນ່ໃຈວ່າມີຄວາມປອດໄພ, ບໍ່ເປັນອັນຕະລາຍ ແລະ ບໍ່ກີດຂວາງການສັນຈອນຂອງລົດຄັນອື່ນ ແລ້ວຈຶ່ງປ່ຽນ ທິດເດີນທາງ ຫຼື ຢຸດລົດໄດ້.