#ດຳລັດວ່າດ້ວຍກົດຈະລາຈອນທາງບົກ ໜ້າ 2

ມາດຕາ 3 ການອະທິບາຍຄໍາສັບ

ຄໍາສັບທີ່ນໍາໃຊ້ໃນດໍາລັດສະບັບນີ້ ມີຄວາມໝາຍ ດັ່ງນີ້:

1. ທາງຫຼວງ ໝາຍເຖິງ ພື້ນທີ່ທັງໝົດສໍາລັບການຈະລາຈອນສາທາລະນະ ເຊັ່ນ ທາງຫຼວງແຫ່ງຊາດ, ທາງຫຼວງແຂວງ, ທາງຫຼວງເມືອງ, ທາງຕົວເມືອງ, ທາງຊົນນະບົດ, ທາງສະເພາະ ລວມທັງ ທາງດ່ວນ, ຂອບທາງ, ບ່າທາງ, ທາງຄົນຍ່າງ ແລະ ທາງລົດຖີບ;

2. ຜູ້ຂັບຂີ່ ໝາຍເຖິງ ບຸກຄົນທີ່ມີໜ້າທີ່ບັນຊາ ຍານພາຫະນະ ແລະ ພາຫະນະໄປຕາມທາງ ລວມທັງ ຜູ້ທີ່ຮຽນຂັບລົດ;

3. ຜູ້ຊ້ອນທ້າຍ ໝາຍເຖິງ ຜູ້ໂດຍສານ ຫຼື ຜູ້ຕິດຕາມຍານພາຫະນະ ສອງລໍ້, ສາມລໍ້, ລົດຈັກ, ລົດຖີບ ທີ່ບໍ່ແມ່ນຄົນຂັບ;

4. ທາງຍ່າງ ໝາຍເຖິງ ອົງປະກອບຂອງທາງຫຼວງ ຊຶ່ງນໍາໃຊ້ສໍາລັບໃຫ້ຄົນຍ່າງສະເພາະ ອາດຈະເຊື່ອມຈອດ ກັບບ່າທາງ, ຂອບທາງ ຫຼື ເດີ່ນຫຍ້າ, ສວນດອກໄມ້ຂັ້ນລະຫວ່າງ ທາງຍ່າງ ກັບ ທາງລົດແລ່ນ;

5. ຄົນຍ່າງ ໝາຍເຖິງ ບຸກຄົນທີ່ຈະລາຈອນຕາມທາງທີ່ບໍ່ໄດ້ນໍາໃຊ້ຍານພາຫະນະ ຫຼື ບໍ່ໄດ້ປະຕິບັດໜ້າທີ່ ຢູ່ຕາມທາງ ລວມທັງ ບຸກຄົນທີ່ນໍາໃຊ້ລໍ້ເລື່ອນຂອງຄົນພິການທີ່ບໍ່ມີເຄື່ອງຈັກ, ຜູ້ຈູງລົດຖີບ, ລົດຈັກ, ລົດໂມເປດ, ຄົນແກ່ລໍ້, ຄົນຍູ້ລໍ້;

6. ທາງໃຫຍ່ ໝາຍເຖິງ ທາງຫຼວງ, ຖະໜົນ ທີ່ມີປ້າຍທາງໃຫ່ຍ ຄົບທາງນ້ອຍ, ປ້າຍບອກທາງໃຫ່ຍ, ປ້າຍ ທາງດ່ວນ ຫຼື ທາງທີ່ມີໜ້າທາງປູດ້ວຍຢາງອາສຟານ, ເບຕົງ ຫຼື ຫີນ ເມື່ອສົມທຽບກັບທາງດິນແດງ, ທາງທີ່ມີຊ່ອງ ຈະລາຈອນຫຼາຍກວ່າ ເມື່ອສົມທຽບກັບທາງທີ່ຕັດຜ່ານ;

7. ທາງນ້ອຍ ໝາຍເຖິງ ທາງທີ່ມີປ້າຍສຸດເຂດທາງໃຫ່ຍ, ປ້າຍປ່ອຍສິດ, ປ້າຍຢຸດ ຫຼື ທາງດິນແດງ, ທາງປູຫິນ ເມື່ອສົມທຽບກັບທາງຄົບ ຫຼື ທາງຕັດຜ່ານປູດ້ວຍຢາງອາສຟານ ຫຼື ເບຕົງ, ທາງທີ່ມີຊ່ອງຈະລາຈອນ ໜ້ອຍກວ່າ ເມື່ອສົມທຽບກັບທາງຄົບ, ຕັດກັນ, ທາງທີ່ສິ້ນສຸດ ຫຼື ໄປຄົບກັບເສັ້ນທາງອື່ນໃນລັກສະນະທາງ ສາມແຍກຮູບໂຕເຕ (T);

8. ທາງດ່ວນ (Expressway) ໝາຍເຖິງ ທາງຫຼວງທີ່ເຊື່ອມຈອດລະຫວ່າງຈຸດໜຶ່ງ ຫາອີກຈຸດໜຶ່ງ, ສາມາດແລ່ນດ້ວຍຄວາມໄວສູງຕະຫຼອດຊ່ວງທາງດັ່ງກ່າວ ໂດຍບໍ່ມີທາງຕັດ ແລະ ທາງຄົບ ຊຶ່ງຜູ້ນໍາໃຊ້ຕ້ອງ ປະຕິບັດຕາມລະບຽບການຈະລາຈອນສະເພາະ;

9. ລົດລາກແກ່ ໝາຍເຖິງ ຍານພາຫະນະທີ່ໃຊ້ລາກແກ່ພາຫະນະດ້ວຍກັນ ທີ່ເປ່ເພ, ເສຍຫາຍ, ລະເມີດ ກົດຈະລາຈອນທາງບົກ, ເກີດອຸບປະຕິເຫດ ທີ່ກີດຂວາງການຈະລາຈອນ;

10. ການຈະລາຈອນ ໝາຍເຖິງ ຂະບວນການນໍາໃຊ້ທາງຫຼວງ ເປັນຕົ້ນ ການຂັບຂີ່ຍານພາຫະນະ ຕາມທາງຫຼວງ, ການສັນຈອນໄປ-ມາ ຂອງຄົນ ຫຼື ການເຄື່ອນຍ້າຍສິ່ງຂອງໂດຍການນໍາໃຊ້ ຫຼື ບໍ່ໄດ້ນໍາໃຊ້ ຍານພາຫະນະຂົນສົ່ງ ໃນຂອບເຂດຂອງທາງ;

11. ອຸບປະຕິເຫດ ໝາຍເຖິງ ເຫດການທີ່ເກີດຂຶ້ນກັບຍານພາຫະນະທີ່ຈະລາຈອນຕາມທາງ ດ້ວຍການ ກະທົບກັບຍານພາຫະນະ, ຄົນ, ສັດ, ວັດຖຸສິ່ງຂອງ, ສິ່ງປຸກສ້າງ ຕາມແຄມທາງ ຊຶ່ງພາໃຫ້ມີຄົນບາດເຈັບ, ເສຍຊີວິດ ຫຼື ຊັບສິນໄດ້ຮັບຄວາມເສຍຫາຍ;

12. ບ່ອນຂ້າມທາງລົດໄຟ ໝາຍເຖິງ ບ່ອນທາງລົດແລ່ນຕັດກັບທາງລົດໄຟ ໃນລະດັບດຽວກັນ;

13. ລົດປະຈໍາທາງ ໝາຍເຖິງ ຍານພາຫະນະຂົນສົ່ງສາທາລະນະທີ່ຮັບໃຊ້ຂົນສົ່ງຜູ້ໂດຍສານ ຊຶ່ງມີ ການກໍານົດສາຍທາງ, ຕາຕະລາງເວລາ ເເລະ ຢຸດ, ຈອດ ເອົາຜູ້ໂດຍສານຂຶ້ນ, ລົງລົດ ຕາມບ່ອນທີ່ໄດ້ກໍານົດໄວ້;

14. ລົດໂມເປດ (Moped) ໝາຍເຖິງ ຍານພາຫະນະປະເພດ ສອງລໍ້ ສາມລໍ້ ທີ່ຕິດເຄື່ອງຈັກຂະໜາດ