#ດຳລັດວ່າດ້ວຍກົດຈະລາຈອນທາງບົກ ໜ້າ 13

ມາດຕາ 40 ການຈອດລົດເພື່ອພັກຜ່ອນໄລຍະຍາວ

ການຈອດລົດເພື່ອພັກຜ່ອນໄລຍະຍາວ ຫຼື ນອນຄ້າງຄືນ ແລະ ອື່ນໆ ຢູ່ຕາມທາງຫຼວງນອກເຂດຕົວເມືອງ ໃຫ້ຈອດຢູ່ລານຈອດລົດທີ່ໄດ້ກໍານົດໄວ້ ຫຼື ຈອດໄວ້ນອກທາງຫຼວງ.

ມາດຕາ 41 ບ່ອນທີ່ບໍ່ອະນຸຍາດໃຫ້ຈອດລົດຊົ່ວຄາວ

ບ່ອນທີ່ບໍ່ອະນຸຍາດໃຫ້ຈອດລົດຊົ່ວຄາວຕາມທາງ ມີ ດັ່ງນີ້:

1. ບ່ອນຂ້າມທາງລົດໄຟ, ໃນອຸໂມງ, ເທິງຂົວ ແລະ ກ້ອງຂົວ;

2. ຕາມແຄມທາງ ບ່ອນທີ່ເສັ້ນແບ່ງໃຈກາງທາງເປັນເສັ້ນເຕັມ ແລະ ໄລຍະຫ່າງ ລະຫວ່າງ ເສັ້ນແບ່ງ ໃຈກາງທາງ ຫາເສັ້ນຂອບທາງ ໜ້ອຍກວ່າ ສາມ ແມັດ ຫຼື ໄລຍະຫ່າງຈາກຂ້າງກໍ້າຊ້າຍຂອງລົດ ທີ່ຈອດຢູ່ຫາ ເສັ້ນແບ່ງໃຈກາງທາງທີ່ເປັນເສັ້ນເຕັມ ໜ້ອຍກວ່າ ສາມ ແມັດ;

3. ທາງມ້າລາຍ ແລະ ໃກ້ທາງຍ່າງທີ່ມີໄລຍະໜ້ອຍກວ່າ ຫ້າ ແມັດ;

4. ຕາມເສັ້ນທາງບ່ອນໃກ້ທາງໂຄ້ງອັນຕະລາຍ, ທາງໂນນ ແລະ ບ່ອນທີ່ການແນມເຫັນຈາກທິດທາງ ໃດໜຶ່ງໜ້ອຍກວ່າ ໜຶ່ງຮ້ອຍ ແມັດ;

5. ໃກ້ທາງແຍກ ຫຼື ປາກທາງເຂົ້າ, ອອກ ສໍານັກງານອົງການ ທີ່ມີໄລຍະ ຫ້າ ແມັດ;

6. ເທິງທາງລົດຖີບ ແລະ ທາງຄົນຍ່າງ;

7. ຈາກບ່ອນຈອດລົດປະຈໍາທາງທີ່ມີໄລຍະໜ້ອຍກວ່າ ສິບຫ້າ ແມັດ, ຖ້າບໍ່ມີເຄື່ອງໝາຍ ໃຫ້ນັບແຕ່ ປ້າຍບອກບ່ອນຈອດລົດປະຈໍາທາງໄປ ສິບຫ້າ ແມັດ ຍົກເວັ້ນກໍລະນີຈອດຊົ່ວຄາວ ເພື່ອເອົາຄົນຂຶ້ນ, ລົງລົດ ຖ້າການຈອດດັ່ງກ່າວ ບໍ່ກີດຂວາງການເຂົ້າຈອດຂອງລົດປະຈໍາທາງ;

8. ບ່ອນທີ່ບັງປ້າຍຈະລາຈອນ, ໄຟສັນຍານ, ຕັນທາງເຂົ້າ, ອອກ ສໍານັກງານອົງການ, ເຮືອນພັກ ແລະ ຕັນທາງຄົນຍ່າງ;

9. ການຈອດລົດຢູ່ແຄມທາງກ້ຳຊ້າຍ ບ່ອນທາງທີ່ມີການສັນຈອນສອງທິດທາງ.

ມາດຕາ 42 ບ່ອນທີ່ບໍ່ອະນຸຍາດໃຫ້ຈອດລົດ

ບ່ອນທີ່ບໍ່ອະນຸຍາດໃຫ້ຈອດລົດຕາມທາງ ມີ ດັ່ງນີ້:

1. ທຸກບ່ອນ ທີ່ບໍ່ອະນຸຍາດໃຫ້ຈອດລົດຊົ່ວຄາວ ຕາມທີ່ໄດ້ກໍານົດໄວ້ໃນມາດຕາ 41 ຂອງດໍາລັດສະບັບນີ້;

2. ທາງຫຼວງ ນອກຕົວເມືອງ ບ່ອນທີ່ມີເຄື່ອງໝາຍທາງໃຫຍ່;

3. ທາງຂ້າມລາງລົດໄຟໃນໄລຍະ ຫ້າສິບ ແມັດ.

ມາດຕາ 43 ການຈອດລົດສຸກເສີນຢູ່ບ່ອນບໍ່ອະນຸຍາດໃຫ້ຈອດ

ໃນກໍລະນີທີ່ມີຄວາມຈໍາເປັນ ຕ້ອງຈອດສຸກເສີນ ຢູ່ບ່ອນບໍ່ອະນຸຍາດໃຫ້ຈອດລົດນັ້ນ, ຍ້ອນສະພາບ ເຕັກນິກຂອງລົດຂັດຂ້ອງ, ເຄື່ອງຂອງທີ່ບັນທຸກບໍ່ຮັບປະກັນຄວາມປອດໄພ ຫຼື ສຸຂະພາບຂອງຜູ້ຂັບຂີ່ບໍ່ສາມາດ ຄວບຄຸມລົດໄດ້ ຕ້ອງເປີດໄຟສັນຍານສຸກເສີນ ພ້ອມທັງຕິດຕັ້ງ ປ້າຍ ເເລະ ເຄື່ອງໝາຍ ສັນຍານສຸກເສີນໄວ້ຕາມ ແຕ່ລະກໍລະນີເພື່ອຄວາມປອດໄພ.

ພາຍຫຼັງທີ່ໄດ້ແກ້ໄຂແລ້ວ ໃຫ້ຮີບຮ້ອນເຄື່ອນຍ້າຍລົດອອກສະຖານທີ່ດັ່ງກ່າວ, ໃນກໍລະນີທີ່ໃຊ້ວັດສະດຸອື່ນ ທີ່ບໍ່ແມ່ນປ້າຍ ແລະ ເຄື່ອງໝາຍຈະລາຈອນ ເປັນຕົ້ນ ພົດໄມ້ ກ່ອນຈະເຄື່ອນຍ້າຍລົດ ຕ້ອງໄດ້ເຄື່ອນຍ້າຍ ຟົດໄມ້ ອອກຈາກທາງເສຍກ່ອນ.