#ດຳລັດວ່າດ້ວຍກົດຈະລາຈອນທາງບົກ ໜ້າ 10
2. ລົດຈັກ, ລົດຂົນສົ່ງ ສິນຄ້າ ແລະ ຜູ້ໂດຍສານ ໃຫ້ແລ່ນດ້ວຍຄວາມໄວບໍ່ເກີນ ເຈັດສິບ ກິໂລແມັດ ຕໍ່ຊົ່ວໂມງ.
ໃນກໍລະນີຂັບຂີ່ຜ່ານເຂດບ້ານ ໃຫ້ແລ່ນດ້ວຍຄວາມໄວບໍ່ເກີນ ຫ້າສິບ ກິໂລແມັດຕໍ່ຊົ່ວໂມງ.
ມາດຕາ 27 ຄວາມໄວຈໍາກັດຕາມທາງດ່ວນ
ການຈະລາຈອນຕາມທາງດ່ວນ ອະນຸຍາດໃຫ້ນໍາໃຊ້ຄວາມໄວ ດັ່ງນີ້:
1. ລົດຈັກ ທີ່ມີຂະໜາດເຄື່ອງຈັກ 350 ຊີຊີ ຂຶ້ນໄປ ໃຫ້ແລ່ນດ້ວຍຄວາມໄວ ແຕ່ ເຈັດສິບ ຫາ ເກົ້າສິບ ກິໂລແມັດຕໍ່ຊົ່ວໂມງ;
2. ປະເພດລົດເບົາ ໃຫ້ແລ່ນດ້ວຍຄວາມໄວແຕ່ແປດສິບ ຫາ ໜຶ່ງຮ້ອຍສິບ ກິໂລແມັດຕໍ່ຊົ່ວໂມງ;
3. ລົດບັນທຸກນ້ຳໜັກລວມເກີນ 3.500 ກິໂລກຣາມ ແລະ ລົດຂົນສົ່ງຜູ້ໂດຍສານ ໃຫ້ແລ່ນດ້ວຍ ຄວາມໄວແຕ່ ເຈັດສິບ ຫາ ເກົ້າສິບ ກິໂລແມັດຕໍ່ຊົ່ວໂມງ.
ມາດຕາ 28 ຄວາມໄວຂອງລົດທີ່ແກ່ກັນ ແລະ ລົດຂົນສົ່ງສິນຄ້າ ເກີນຂະໜາດ
ລົດທີ່ແກ່ກັນ ແລະ ລົດຂົນສົ່ງສິນຄ້າ ເກີນຂະໜາດ ໃຫ້ແລ່ນດ້ວຍຄວາມໄວ ດັ່ງນີ້:
1. ລົດທີ່ແກ່ກັນ ໃຫ້ແລ່ນດ້ວຍຄວາມໄວບໍ່ເກີນ ສີ່ສິບ ກິໂລແມັດຕໍ່ຊົ່ວໂມງ;
2. ລົດຂົນສົ່ງວັດຖຸທີ່ມີ ຂະໜາດໃຫຍ່, ນໍ້າໜັກຫຼາຍ ແລະ ສິນຄ້າອັນຕະລາຍຕ່າງໆ ທີ່ເຮັດການຂົນສົ່ງ ລະຫວ່າງປະເທດ, ຜ່ານແດນ ຫຼື ຂ້າມແດນ ໃຫ້ແລ່ນດ້ວຍຄວາມໄວ ຕາມທີ່ໄດ້ກໍານົດໄວ້ໃນສັນຍາຂົນສົ່ງພິເສດ ສອງຝ່າຍ ຫຼື ຫຼາຍຝ່າຍ.
ມາດຕາ 29 ການຈະລາຈອນຕາມທາງຫຼວງໃນເຂດທີ່ຢູ່ອາໄສ, ທາງພາຍໃນບ້ານ
ການຈະລາຈອນຕາມທາງຫຼວງໃນເຂດທີ່ຢູ່ອາໄສ, ທາງພາຍໃນບ້ານ ຕ້ອງປະຕິບັດ ດັ່ງນີ້:
1. ຄົນຍ່າງມີບູລິມະສິດເໜືອລົດ, ສາມາດຍ່າງຕາມແຄມທາງຫຼວງ ດ້ວຍຄວາມລະມັດລະວັງ ແລະ ບໍ່ກີດຂວາງການຈະລາຈອນ ຂອງຍານພາຫະນະ;
2. ບໍ່ອະນຸຍາດ ໃຫ້ຮຽນຂັບລົດ, ຈອດລົດໂດຍບໍ່ມອດຈັກ, ຈອດລົດຂົນສົ່ງທີ່ມີນໍ້າໜັກລວມເກີນ 3.500 ກິໂລກຣາມ ໄວ້ຕາມແຄມທາງຫຼວງ ນອກຈາກເຂດທີ່ກໍານົດໃຫ້ສໍາລັບການຄ່ຽນຖ່າຍສິນຄ້າ;
3. ຜູ້ຂັບຂີ່ ທີ່ອອກຈາກເຂດທີ່ຢູ່ອາໄສ ຫຼື ເຂດບ້ານ ທີ່ຈະເຂົ້າສູ່ເສັ້ນທາງການສັນຈອນ ຕ້ອງປ່ອຍທາງ ໃຫ້ຍານພາຫະນະ ທີ່ສັນຈອນຕາມທາງຫຼວງສາຍຫຼັກ ໄປກ່ອນ.
ມາດຕາ 30 ລົດທີ່ແລ່ນດ້ວຍຄວາມໄວຕໍ່າ
ລົດທີ່ແລ່ນດ້ວຍຄວາມໄວບໍ່ເກີນ ຫ້າສິບ ກິໂລແມັດຕໍ່ຊົ່ວໂມງ ຕ້ອງແລ່ນຕາມຊ່ອງຈະລາຈອນຂວາສຸດ ຍົກເວັ້ນໃນເວລາຈະລ້ຽວຊ້າຍ ຫຼື ລ້ຽວກັບ ແລະ ຈອດລົດ ໃນກໍລະນີທີ່ອະນຸຍາດໃຫ້ຈອດລົດກໍ້າຊ້າຍໄດ້.
ມາດຕາ 31 ການຮັກສາໄລຍະຫ່າງ
ຜູ້ຂັບຂີ່ ທີ່ສັນຈອນຕາມຊ່ອງຈະລາຈອນ ຕ້ອງຮັກສາໄລຍະຫ່າງຈາກລົດຄັນທາງໜ້າໃຫ້ພຽງພໍ ແລະ ເໝາະສົມກັບຄວາມໄວ ເພື່ອຮັບປະກັນຄວາມປອດໄພ. ໃນກໍລະນີລົດຄັນທາງໜ້າຫາກຢຸດຢ່າງກະທັນຫັນ ຕ້ອງຮັກສາໄລຍະຫ່າງກັບລົດຄັນອື່ນ ທີ່ແລ່ນຢູ່ທາງຂ້າງຢ່າງເໝາະສົມ ເພື່ອຫຼີກເວັ້ນການເກາະ, ດາດ ຫຼື ຕໍາກັນ.